Skilti leigusalans og Sjálfstæðismannsins Viðars Guðjohnsen við Mörkina í Reykjavík hefur vakið athygli vegfarenda og netverja á undanförnum árum. Á því hafa staðið pólitísk skilaboð frá eiganda þess, en hann hefur nú breytt textanum á því og auglýsir leiguíbúðir sínar í húsinu við Mörkina 8.
Þegar lénið Mörkin8.is sem nú er gefið upp á skiltinu er slegið inn í vafra birtist hins vegar síða með textanum úr Kommúnistaávarpinu eftir Karl Marx og Friedrich Engels.
Svo virðist sem lénið Morkin8.is, með sérhljóðanum o, hafi verið skráð hjá ISNIC á jóladag í fyrra, en engin síða hefur þó verið sett upp á þeirri slóð. Lénið Mörkin8.is, með sérhljóðanum ö, var hins vegar skráð síðastliðinn sunnudag og sendir lesendur áfram á áðurnefndan byltingartexta. Má því draga þá ályktun að um hrekk sé að ræða og að einhver hafi viljað sýna hugsanlegum leigjendum hins hægrisinnaða Viðars grunntexta kommúnismans.
Davíð Oddsson með „alsjáandi auga“
Skiltið hefur verið nokkuð í fréttum undanfarin ár, en á því hafa staðið pólitísk skilaboð frá Viðari, meðal annars „Nei ESB“, „Nei Schengen“, „Áfram Trump“ og „Lesið Moggann Reykjavíkurbréf“. Er þar vísað í nafnlausa ritstjórnarpistla Morgunblaðsins sem eru á ábyrgð ritstjóra blaðsins, Haraldar Johannessen og Davíðs Oddssonar.
„Við erum að finna svo góðar útskýringar á hinu og þessu hjá okkar ástkæra Davíð Oddssyni, sem er náttúrlega mikill reynslubolti í lífinu og veit líka hvað er að gerast alls staðar í heiminum. Hann er með alsjáandi auga,“ sagði hann um skiltið við Fréttablaðið.
Reglulega hafa verið unnin skemmdarverk á skiltinu frá því Viðar setti það upp fyrir nokkrum árum. Var meðal annars textanum breytt í „Áfram Dump“ og einnig krotað „ACAB“ sem er skammstöfun fyrir „All cops are bastards“ eða „Allar löggur eru skíthælar“.
Baráttan beinist gegn femínistum
Viðar sjálfur hefur kennt sig við „harðlínu hægri“ og bauð sig fram í leiðtogaprófkjöri Sjálfstæðisflokksins fyrir borgarstjórnarkosningar 2018, en hafði ekki erindi sem erfiði. Viðar hefur talað fyrir því að heimilislaust fólk og fíkniefnaneytendur, einkum af erlendu bergi brotnu, séu látnir mæta örlögum sínum án þess að fá hjálp. Þá hefur hann talað fyrir varðstöðu um „lífsrými“ Íslendinga, en orðið lífsrými samsvarar þýska hugtakinu Lebensraum sem skipar veigamikinn sess í orðræðu og hugmyndafræði nasista.
Hefur Viðar sagt baráttu sína beinast gegn femínistum „sem eru eins og mafíusamtök og eru með sósíalíska hugmyndafræði á bak við sig því þeir vilja láta stofnanir ala upp börn sín,“ eins og hann sagði í viðtali við Vísi. Hlutverk kvenna í þjóðfélaginu hefur verið honum hugleikið og hefur hann sagt að konur nenni ekki að ala upp börnin sín og eftirláti tölvum og símum það verkefni. Í aðdraganda leiðtogaprófkjörsins spurði hann eina kvenkyns mótframbjóðanda sinn: „Ætlar þú að hlýða mér, ef ég verð forystumaðurinn og vera undir mér og hlýða mér?“
„Væri ekki betra ef hann ætti fullt af börnum?“
Þá hefur Viðar óhefðbundnar hugmyndir um fjölskylduformið og einhvers konar kynbótastefnu. „Af hverju er svona æðislegt að þjóna hommum og lesbíum?“ sagði hann í útvarpsþættinum Harmageddon. „Það á auðvitað að leyfa fjölkvæni hér á landi. Sjáið til dæmis Gylfa Þór Sigurðsson [knattspyrnumann]. Hann er hraustur og á nóg af peningum. Væri ekki betra ef hann ætti fullt af börnum?“
Athugasemdir