Brennisteinslykt finnst nú í Grindavík og almannavarnir beina því til íbúa í Þorlákshöfn að loka gluggum og hækka hita í húsum vegna þess að búast megi við gasmengun í bænum.
Hraun er nú farið að flæða til suðurs og vesturs frá eldgosinu sem hófst í kvöld á sprungu á tveimur eða fleiri stöðum í Geldingagald við Fagradalsfjall. Lítill gosórói finnst, sem þykir óvenjulegt.
Sigurbjörg Vignisdóttir, íbúi í Grindavík, segir að eldgosið veki með henni undarlegar tilfinningar. „Í kvöld byrjaði að gjósa í Geldingagjölu en ekki á þeim stað þar sem vísindamenn höfðu búist við. Einhvern veginn er þetta loksins komið, á sama tíma hélt ég samt að þetta myndi aldrei gerast. En ég hef aldrei verið hrædd, hvorki við jarðskjálftana né við að það byrji að gjósa, en ég veit að það er fullt af fólki í kringum mig sem er skíthrædd.“
Hún segir að stemmingin í Grindavík sé misgóð. „Hér er mikil spenna og forvitni, sumir eru hræddir en öðrum þykir þetta spennandi. Það er ákveðinn léttir að gosið sé hafið og ég segi það í von um að skjálftar muni þá róast.“
Hún segir að nú sé mikill reitingur í bænum. „Fólk flykkist út að skoða eldgosið og reyna að fá góðar myndir og myndbönd. Gosið sést vel frá Grindavík og er eins og fallegt sólsetur. Það er einstaklega gott skyggni svo að þetta sérst allt mjög vel.“
Sigurbjörg segir jafnframt að það sé gríðarleg mikil ásókn í að komast út á Reykjanesið núna úr Reykjavík. „Vinkona mín þurfti að berjast við að komast til Grindavíkur úr bænum. Brautinni var lokað frá Straumsvík.“
Reykjanesbrautinni lokað
Íbúi í Reykjanesbæ sem hringdi inn í útsendingu Rúv kvartar undan því að Reykjanesbrautin sé lokuð og fólk komist ekki heim til sín.
„Þetta er bara fáránlegt. Þetta er bara kolvitlaust fólk sem er að reyna að mynda einhvern bjarma. Brautin er stífluð af forvitnu fólki og heimamenn komast ekki heim til sín,“ sagði maðurinn, sem þurfti að hverfa frá vegna lokunar. „Það er ekkert betra að vera í bílunum sínum í gasmengun af eldgosi.“
Léttir að gosið sé hafið
Undir það tekur Ingibergur Þór Jónasson, sem býr einnig í Grindavík. Hann náði þessum myndum þar sem sést í eldtungur um ellefuleytið í kvöld, þegar hann keyrði inn eftir Suðurstrandavegi í átt að Festisfjalli. Á heimleið lenti hann í umferðarþunga og segir að á Grindarvíkurvegi sé bíll við bíl alla leiðina, bílum lagt í kant við Seltjörn og mikil ásókn sé í að komast út á Reykjanes.
Hann segir ákveðinn létti fylgja því að gosið sé hafið. „Þetta er búið að vera helvíti hér undanfarna daga og ekkert hægt að sofa vegna skjálftanna. Undanfarna daga hefur verið óþægilega rólegt því ég trúði aldrei öðru en að það myndi byrja að gjósa að lokum.“ Hann hafi óttast að þetta væri lognið á undan storminum, hvort það væri von á stórum skjálfta eða eldgosi. „Á sama tíma finnst mér þetta spennandi, ég elska náttúruna og elska að taka myndir og treysti því að okkur stafi engin ógn af eldgosinu.“
Í skjálftahrinunni hafi á einum tímapunkti liðið tæpir þrír sólarhringar þar sem hann náði ekki meira en tveimur og hálfum tíma í svefni. „Samt búum við í nýju og sterku húsi sem fór ekkert af stað. Þetta var bara komið svo nálægt okkur. Stóri skjálftinn um daginn var nánast undir húsinu mínu.“
Sér eldgosið úr bakgarðinum
Sólný Pálsdóttir, sem býr við jaðar byggðarinnar í Grindavík, segist hafa verið að horfa á sjónvarpið þegar bjarmi kom upp á himninum.
„Við erum alveg róleg. Ekkert drama. En ég er samt að bíða eftir að heyra fréttirnar. Það er útsýnispallur af svölunum hjá mér þar sem ég get séð þetta vel. Þetta er í bakgarðinum mínum, nánast.“
Sólný segir síðustu vikur hafa verið erfiðar. Hún upplifir óþægindi en ekki ógn. „Ég treysti því sem fræðimenn segja að þetta eigi ekki að ógna byggð. Þetta virðist ekki ætla að ógna byggðinni. Ég held að ég þurfi ekki að pakka, eða allavega vona ekki. Vonandi er þetta bara smásprenging og allir öruggir. Það er náttúrulega málið. Miðað við þessa skjálfta hefur maður verið að bíða eftir þessu. Fyrir þá sem upplifa þessa skjálfta er þetta svo mikið álag á taugakerfið. Þetta er kannski ekki ógnvekjandi, en þetta er óþægilega nálægt. Ég er ekki hrædd. Maður er kannski meira í smá ójafnvægi.“
Eldgos við Fagradalsfjall
Þetta er gönguleiðin að nýja eldgosinu
Hér er sérstakt hættusvæði hjá eldgosinu
„Margfalt meiri kraftur“ í nýja eldgosinu sem teygir sig norðar
Gosið stöðvaðist en fór aftur af stað
Rukka inn á drullusvað
Athugasemdir