Íslensku bókmenntaverðlaunin í flokki barna- og ungmennabóka fengu Arndís Þórarinsdóttir og Hulda Sigrún Bjarnadóttir fyrir bókina Blokkin á heimsenda. Hvati höfunda var að hafa gaman og úr varð frásögn af eyju sem reynist ansi vel heppnaður míkrókosmós af gamla Íslandi.
Dröfn er á leiðinni út í eyju með fjölskyldunni sinni. Eyjuna þar sem Bríet amma hennar býr, eða amma Eyja eins og þau kalla hana oftast. Amman, sem hún þekkir ekki, af því hún kemur aldrei í heimsókn á meginlandið, enda er eyja þessi afskekktust allra eyja. Stelpan hlakkar til, hún hefur alist upp án ömmu en hefur þó sínar hugmyndir um ömmur, sprottnar jafnt úr bókmenntaarfi ömmubókmennta og úr frásögnum vina hennar. En amman kallar hana helst aldrei með nafni og er lítið fyrir hefðbundin ömmuhlutverk.
Athugasemdir