„Hefði frekari vopnavæðing lögreglunnar komið í veg fyrir skotárásina á laugardaginn? Nei. Hefði aukið eftirlit með lögreglunni, úttekt á starfsumhverfi hennar almennt, getað komið í veg fyrir atburðinn á laugardaginn? Ég kýs alla vega að trúa því.“

Þetta sagði Olga Margrét Cilia, þingmaður Pírata, á Alþingi í dag. Olga kvað sér hljóðs undir liðnum störf þingsins til þess að ræða umræðu um vopnaburð lögreglunnar sem spratt upp í kjölfar banvænnar skotárásar í Bústaðahverfinu á laugardagskvöld. Erlendur karlmaður á fertugsaldri var skotinn til bana og er málið talið tengjast skipulagðri glæpastarfsemi. Fjórir voru handteknir og færðir í gæsluvarðhald vegna málsins og í dag tilkynnti lögreglan að fjórir til viðbótar hefðu verið handteknir í aðgerðum í gær.

Sigríður Björk Guðjónsdóttir ríkislögreglustjóri sagði í Reykjavík síðdegis á Bylgjunni í gær að vopnareglur lögreglunnar verði ræddar á fundi lögregluráðs á morgun. Þá sagði Vilhjálmur Árnason, þingmaður Sjálfstæðisflokks, í sama þætti á mánudag að þjálfa þurfi almenna lögreglumenn í að vopnbúast.

„Ég vona að lögreglan sé ekki að fara að nota þann sorglega atburð sem lóð á vogarskálar fyrir þeim málflutningi að vopnavæða lögregluna enn frekar,“ sagði Olga Margrét á Alþingi í dag. „Lögreglan var hvergi nálægt þegar skotárásin átti sér stað svo það myndi skila litlu að nýta árásina í að undirbyggja málflutning um frekari vopnakaup lögreglu. Í svari innanríkisráðherra við fyrirspurn um vopnaeign lögreglunnar frá 2015 kemur fram að lögreglan átti þá samtals 590 vopn. Á tímabilinu 1. janúar 2015 til 10. júní 2020 voru keypt 188 vopn til viðbótar. Lögreglan er því vopnavædd og því spurning hvort ekki þurfi að auka eftirlit með núverandi vopnaeign í stað þess að auka fjölda vopna.“

„Þá erum við komin ansi nálægt því að búa í lögregluríki“

Þingmaðurinn sagði frekari vopnavæðingu lögreglunnar ekki leysa nein vandamál. „Ég vona að þingheimur átti sig á því þegar pressan frá lögreglunni kemur inn fyrir dyr með miklum krafti,“ sagði Olga Margrét. „Hvað varðar heimildir lögreglu til að rannsaka skipulagða starfsemi megum við ekki gleyma því að aðgerðir lögreglu fela í sér inngrip í friðhelgi einkalífs og það er ekki að ástæðulausu að heimildum lögreglu til að grípa inn í einkalíf einstaklinga séu settar skorður. Yfirmenn lögreglunnar telja að á Íslandi séu slakari reglur varðandi valdheimildir lögreglu miðað við samstarfslönd. Það þarf ekki endilega að vera slæmt ef við skoðum málið með réttindi einstaklinga í forgrunni. Lögreglan, eins og önnur stjórnvöld, má aldrei fá óskoraðar valdheimildir til eins eða neins. Þá erum við komin ansi nálægt því að búa í lögregluríki.“