Verða sér úti um falskt læknisvottorð til að komast hjá grímuskyldu

Meðlimur í hópnum Coviðspyrnan, hóp sem stofn­aður var til að „skipu­leggja við­spyrnu gegn öfga­fullum og skað­legum aðgerðum yfir­valda gegn Covid“, dreifir ráð­legg­ingum um hvernig hægt sé að kom­ast undan grímu­skyldu. 

„Ég hitti engan lækni, hringdi bara í heilsu­gæslu og bað um að tala við lækni út af vott­orði. Sótti það sam­dæg­urs. Svo já, allir geta fengið þetta. Og þetta virkar. Búinn að fara á marga staði og prófa,“ skrif­aði mað­ur­inn í ummælum undir færslu sem hann setti inn í hóp­inn. Upp­hafsinn­leggið var mynd af lækn­is­vott­orði sem und­an­skilur hann grímu­skyldu.

Fleiri vilja fá vottorð 

Þegar ummæli við færsl­una eru skoðuð má sjá að mað­ur­inn lætur með­limi hóps­ins vita hvar hann hefur prófað að ganga inn grímu­laus með vott­orð. Nokkrir með­limir segj­ast ætla að útvega sér slíkt vott­orð sjálfir.

„Á dag­skrá mánu­dags­ins að fá vott­orð fyrir alla fjöl­skyld­una,“ skrif­aði einn þeirra.

„Ég ætla að hringja í mína heilsu­gæslu og fá mér svona,“ skrif­aði annar.

Einn með­lim­ana stakk upp á að með­limir hóps­ins myndu ganga saman inn í verslun grímu­laus til að „sýna hinum hvernig lífið var „fyrir“ Covid“. 

Mælti með aðferðum til að fá vottorð

Þá voru gefnar ráð­legg­ingar um það hvað sé best að segja við lækni, vilji maður verða sér út um vott­orð. „Veit að í Þýska­landi hefur virkað vel að tala um að maður hafi lent í því að reynt hafi verið að kæfa mann og gríman fái mann til að end­ur­upp­lifa það,“ benti einn með­lim­ur­inn á.

Maðurinn sem um ræðir sagði hins vegar við sinn lækni að gríman ylli honum kvíða­köstum, inni­lok­un­ar­kennd og önd­un­ar­erf­ið­leikum.

Einn með­limur sagð­ist ætla að verða sér út um vott­orð og von­að­ist til þess að hann myndi hitta á „góðan lækni.“ Maðurinn benti honum þá á að „útlenskir eru skiln­ings­rík­ari af þeim sem ég hef heyrt um vott­orðið.“