Loforð rík­is­stjórn­ar­innar um 600 millj­óna króna sér­staka frí­stunda­styrki til barna tekju­lágra for­eldra, sem boð­aðir voru í aðgerða­pakka 2 vegna Covid-19, eru enn óupp­fyllt. Umræddur stuðn­ingur var kynntur á kynn­ing­ar­fundi rík­is­stjórn­ar­innar 21. apríl síð­ast­lið­inn. Í nefnd­ar­á­liti meiri­hluta fjár­laga­nefndar við frum­varp til fjár­auka­laga fyrir árið 2020 var sér­stak­lega til­tekið að styrk­ina ætti að veita til að „öll börn geti óháð efna­hag stundað íþróttir og aðrar tóm­stundir í sumar.“ Engir slíkir styrkir voru greiddir út í sumar og hafa enn ekki verið greiddir.

Í kynn­ingu á aðgerð­unum, sem kynnt voru sem fram­hald efna­hags­að­gerða stjórn­valda vegna heims­far­ald­urs kór­ónu­veiru, kom fram að ráð­ast ætti í fjöl­þættar aðgerðir til að vernda hag barna og fjöl­skyldna þeirra. Þar undir voru umræddir styrkir sem voru sagðir vera stuðn­ingur við börn á tekju­lægri heim­ilum til að stunda íþrótta- og frí­stunda­starf.

Til­greint var að veittur yrði 50 þús­und króna frí­stunda­styrkur á barn til fjöl­skyldna þar sem sam­an­lagðar tekjur væru lægri en 740 þús­und krónur á mán­uði. Fram­kvæmd styrk­veit­ing­anna ætti að vera á höndum sveit­ar­fé­lag­anna og áætlað heild­ar­fram­lag næmi 600 millj­ónum króna.

Hefði komið efnaminni foreldrum vel

Í umsögnum um fjár­auka­lög má sjá að umsagn­ar­að­ilar fögn­uðu boð­uðum stuðn­ingi. Þannig sagði í umsögn Alþýðu­sam­bands Íslands að sam­bandið styddi ráð­stöf­un­ina og benti á mik­il­vægi þess að grípa fljótt til aðgerða til að koma í veg fyrir að áföll og efna­hags­legar afleið­ingar þeirra bitni á þeim hópum sem síst gætu varið sig. BSRB fagn­aði til­lög­unni, sem og Öryrkja­banda­lag Íslands. Samband íslenskra sveit­ar­fé­lag sagði aðgerð­ina „mjög jákvæða“ og vís­aði til þess að gera ætti öllum börnum, óháð efna­heg, kleift að stunda íþróttir og aðrar tóm­stundir „í sumar.“

Í umsögn Reykja­vík­ur­borgar um frum­varpið segir: „Fjár­munir í frí­stunda­starf barna og ung­menna er aðgerð sem mun koma börnum efna­lít­illa for­eldra í Reykja­vík til góða,“  en skýra þyfti hvort nota megi frí­stunda­styrk­inn í sum­ar­nám­skeið sveit­ar­fé­laga. Í umsögn­inni er jafn­framt bent á að nú þegar sé til staðar fyr­ir­komu­lag til að fram­kvæma aðgerð­ina hjá sveit­ar­fé­lög­unum, í til­felli Reykja­vík­ur­borgar Frí­stunda­kortið, og því ætti tækni­leg útfærsla að vera ein­föld. Í umsögn Ung­menna­fé­lags Íslands var „skjótum við­brögðum“ fagnað enda sýndu rann­sóknir gíf­ur­legt for­varn­ar­gildi sem fælist í skipu­lögðu íþrótta- og tóm­stunda­starfi. Hins vegar þyrfti að tryggja auð­velda úrvinnslu til að aðgerðin næði til allra hópa, jafnt þeirra sem stæðu á jaðr­inum og fjöl­skyldna af erlendu bergi brotnu.

Veita átti styrkina til að börn gætu stundað frístundastarf í sumar

Meiri­hluti fjár­laga­nefndar til­tók í nefnd­ar­á­liti sínu um fjár­auka­lög, þar sem lögð var til fjár­heim­ild að sér­ækum stuðn­ingi til sveit­ar­fé­laga upp á 600 millj­ónir í þessu skyni, að það væri gert til að gera sveit­ar­fé­lög­unum kleift að veita „styrki til tekju­lágra heim­ila þannig að öll börn geti óháð efna­hag stundað íþróttir og aðrar tóm­stundir í sumar.“ Fjár­auka­lög, með umræddri heim­ild, voru afgreidd sem lög frá Alþingi 11. maí síð­ast­lið­inn.

„Útfærsla á fram­kvæmd úrræð­is­ins er í vinnslu og verður kynnt á næstu dögum“

Sem fyrr segir hafa engir sér­stakir frí­stunda­stykir verið veittir í suma og ekki enn nú 2. sept­em­ber. Á vef­síðu stjórn­ar­ráðs­ins er að finna und­ir­síðu sem ber yfir­skrift­ina Spurt og svarað um efna­hags­að­gerðir stjórn­valda vegna Covid-19. Þar er hægt að finna spurn­ing­una: Hvernig sæki ég um stuðn­ing fyrir tóm­stunda­starf barn­anna minna? Svarið við þeirri spurn­ingu er: Útfærsla á fram­kvæmd úrræð­is­ins er í vinnslu og verður kynnt á næstu dögum. Óljóst er hvenær umrætt svar var upp­fært. Á vef­síðu Sambands íslenskra sveit­ar­fé­laga má einnig finna upp­lýs­inga­síðu þar sem staða aðgerða í aðgerða­pökkum rík­is­stjórn­ar­innar vegna Covid-19 sem snúa að sveit­ar­fé­lög­unum er tíunduð. Þar segir að unnið sé að „tækni­legri útfærslu en stefnt er að því að hægt verði að sækja um raf­rænt á haust­mán­uðum.“

Stundin óskaði svara hjá félags­mála­ráðu­neyt­inu hvað liði stuðn­ingnum, og hvenær mætti ætla að hann kæmi til fram­kvæmda. Enn fremur óskaði Stundin upp­lýs­inga um vinnslu verk­efn­is­ins. Svör höfðu ekki borist þegar fréttin var birt.