Félag frétta­manna gagn­rýnir að „stór­fyr­ir­tækið Samherji skuli veit­ast að per­sónu Helga Seljan frétta­manns með ómak­legum hætti“. Þekkt sé að fjár­sterkir aðilar grafi undan trausti á fjöl­miðlum sem skapi hættu fyrir lýð­ræðið.

Þetta kemur fram í yfir­lýs­ingu frá félag­inu sem Alma Ómars­dóttir for­maður skrifar undir. Frétt­blaðið fjall­aði á for­síðu í dag um óút­komið mynd­band sjáv­ar­út­vegs­fyr­ir­tæk­is­ins Samherja sem birt var á YouTube í morgun. Í því er haldið fram að Helgi hafi árið 2012 byggt umfjöllun sína um meint brot Samherja á gjald­eyr­is­lögum í Kast­ljósi á gögnum sem hafi verið röng, hann hafi ýmist breytt umræddum gögnum eða falsað þau.

„Stjórn Félags frétta­manna lýsir einnig undrun sinni og von­brigðum með að sumir fjöl­miðlar hafa tekið algjör­lega gagn­rýn­is­laust upp ásak­anir og fram­setn­ingu í mynd­bandi stór­fyr­ir­tæk­is­ins sem birt var í morgun,“ segir í yfir­lýs­ing­unni.

Helgi sjálfur, útvarps­stjóri og frétta­stjóri Rík­is­út­varps­ins hafa öll hafnað ásök­unum Samherja. Svaraði Helgi þeim í löngu máli í færslu sem Þóra Arn­órs­dóttir, rit­stjóri Kveiks, birti fyrir hönd þátt­ar­ins.

„Myndband fyr­ir­tæk­is­ins, sem birt var í dag, virð­ist hafa verið unnið til þess eins að vekja efa­semdir um rétt­mæta umfjöllun fjöl­miðla um mál­efni fyr­ir­tæk­is­ins,“ segir í yfir­lýs­ingu Félags frétta­manna. „Það er áhyggju­efni að for­svars­menn stór­fyr­ir­tækja, sem fjöl­miðlar fjalla eðli­lega um, skuli velja að reyna að gera ein­staka fjöl­miðla­menn tor­tryggi­lega í stað þess að svara efn­is­lega þeim atriðum sem fram hafa komið í umfjöllun fjöl­miðla um starf­semi fyr­ir­tæk­is­ins. Það vekur jafn­framt áhyggjur að fyr­ir­tækið skuli birta slíkar ávirð­ingar í gervi heim­ilda­þáttar og grafa þannig undan fjöl­miðlum almennt.“

Yfirlýsingin í heild sinni:

Stjórn Félags frétta­manna gagn­rýnir harð­lega að stór­fyr­ir­tækið Samherji skuli veit­ast að per­sónu Helga Seljan frétta­manns með ómak­legum hætti. Myndband fyr­ir­tæk­is­ins, sem birt var í dag, virð­ist hafa verið unnið til þess eins að vekja efa­semdir um rétt­mæta umfjöllun fjöl­miðla um mál­efni fyr­ir­tæk­is­ins.

Það er áhyggju­efni að for­svars­menn stór­fyr­ir­tækja, sem fjöl­miðlar fjalla eðli­lega um, skuli velja að reyna að gera ein­staka fjöl­miðla­menn tor­tryggi­lega í stað þess að svara efn­is­lega þeim atriðum sem fram hafa komið í umfjöllun fjöl­miðla um starf­semi fyr­ir­tæk­is­ins. Það vekur jafn­framt áhyggjur að fyr­ir­tækið skuli birta slíkar ávirð­ingar í gervi heim­ilda­þáttar og grafa þannig undan fjöl­miðlum almennt.

Þekkt er víða um heim að fjár­sterkir aðilar beiti ýmsum aðferðum til að vekja efa­semdir um frétta­flutn­ing sem að þeim snýr. Það skapar þá hættu að grafið sé undan trausti á fjöl­miðlum og að fjöl­miðlar veigri sér við að fjalla um ein­staka aðila. Af því er mikil hætta búin fyrir lýð­ræð­is­legt sam­fé­lag sem byggir á því að almenn­ingur fái að vita hvað ráða­menn í stjórn­málum og áhrifa­menn í við­skiptum og atvinnu­lífi aðhaf­ast. Slíkt hefur legið í loft­inu síðan Kveikur, Stundin og Al Jazeera fjöll­uðu um Sam­herj­a­skjölin síð­ast­liðið haust.

Stjórn Félags frétta­manna lýsir einnig undrun sinni og von­brigðum með að sumir fjöl­miðlar hafa tekið algjör­lega gagn­rýn­is­laust upp ásak­anir og fram­setn­ingu í mynd­bandi stór­fyr­ir­tæk­is­ins sem birt var í morgun.

Alma Ómars­dóttir, for­maður Félags frétta­manna