Flugfreyjufélag Íslands fordæmir aðgerðir Icelandair í dag, boðar verkföll og kallar eftir inngripi stjórnvalda. Flugfélagið tilkynnti í dag að viðræðum um samninga við flugþjóna yrði slitið og öllum yrði sagt upp. Þess í stað mundu flugmenn taka að sér störf öryggisliða um borð í flugvélum.

„Stjórn og trúnaðarráð Flugfreyjufélags Íslands (FFÍ) fordæmir óvænt og einhliða viðræðuslit Icelandair sem birt voru í fjölmiðlum í dag,“ segir í yfirlýsingunni. „Afstaða Icelandair setur FFÍ í þá afleitu stöðu að þurfa að hefja undirbúning að tafarlausum og víðtækum verkfallsaðgerðum. FFÍ er aðili að Alþýðusambandi Íslands og alþjóðlegum verkalýðssamtökum og hefur fullan stuðning við aðgerðir sínar þar. Samstöðuaflinu verður beitt af fullum þunga.“

Félagið telur ekki boðlegt að flugmenn sinni störfum öryggisliða eins og boðað hefur verið. „Það eru gríðarleg vonbrigði að Icelandair kalli eftir því að flugmenn gangi í störf félagsmanna FFÍ og ég neita að trúa því fyrr en ég tek á því að vinnufélagar okkar muni koma þannig fram við samstarfsfélaga sína um árabil. Afstaða og viðhorf Icelandair í málinu eru til skammar og ég hef trú á að almenningur tekur slíkri lítilsvirðingu við launfólk ekki þegjandi og hljóðalaust,“ er haft eftir Guðlaugu Líney Jóhannsdóttur, formanni Flugfreyjufélags Íslands.

„Afstaða og viðhorf Icelandair í málinu eru til skammar“

Í yfirlýsingunni er kallað eftir því að stjórnvöld líti til aðgerða fyrirtækisins. „Icelandair hefur á undanförnum mánuðum þegið háar fjárhæðir úr opinberum sjóðum og FFÍ væntir þess að málið verði tekið fyrir á vettvangi stjórnvalda hið fyrsta og geri þá kröfu til stjórnenda fyrirtækisins að þeir virði lög og leikreglur á íslenskum vinnumarkaði.“

Karlarnir feli sig bak við samfélagslega ábyrgð

Sólveig Anna Jónsdóttir, formaður Eflingar, tjáði sig um málið á Facebook síðu sinni í dag. „Ég hef aldrei vitað annað eins: Karlar ætla að ganga í störf kvenna sem verða fyrir eins ógeðslegri framkomu og hægt er að hugsa sér, eru reknar úr starfi eins og eitthvað drasl, þrátt fyrir ára og áratuga starfsferil,“ skrifaði hún. „Karlarnir ætla um leið og þeir taka þátt í svívirðunni að fela sig á bak við samfélagslega ábyrgð, að hér verði bara að tryggja samgöngur stöðvist ekki.“

Vísaði hún til orða Jóns Þórs Þorvaldssonar, formanns Félags íslenskra atvinnuflugmanna og varaþingmanns Miðflokksins, á vef Morgunblaðsins þess efnis að flugmenn þurfi að tryggja öryggi í flugvélum og geti því ekki vikið sér undan ábyrgðinni. Hann liti ekki svo á að með þessu væru flugmenn að ganga í störf flugþjóna.

„Ef þeir standa ekki í lappirnar hér er skömm þeirra mikil“

„Ég vona af öllu hjarta að félagsmenn í Fé­lagi ís­lenskra at­vinnuflug­manna sjái hversu ömurlegt það er að standa ekki með flugfreyjum og taki ekki þátt í að hjálpa Icelandair að komast upp með svívirðilega framkomu með því að ganga í störf samstarfsfólks síns,“ skrifaði Sólveig Anna. „Ef þeir standa ekki í lappirnar hér er skömm þeirra mikil.“