„Ég var bara að leigja sjálfur út herbergin. Og leigi yfirleitt útlendingum af því að ég hef ekki áhuga á því að leigja Íslendingum. Útlendingarnir borga en ekki Íslendingarnir.“ Þetta segir Kristinn Jón Gíslason í samtali við Stundina. Hann er eigandi HD verks ehf, sem á meðal annars eignina á Bræðrarborgarstíg 1 í Vesturbæ Reykjavíkur sem brann til kaldra kola í síðustu viku. Þrír létust í eldsvoðanum, en talið er að um íkveikju hafi verið að ræða.

Kristinn hefur ekki viljað tjá sig við fjölmiðla um brunann hingað til, en hann segir að það sé von á fréttatilkynningu eftir helgi þar sem hann útskýri sína hlið á málinu. Hann segist hafa undir höndum myndir og upptöku sem sýna að einn leigjandinn beri ábyrgð á eldsvoðanum. „Það mætti kannski koma betur fram að því miður þá lítur allt út fyrir að maður sem greinilega varð mjög veikur andlega kveikti í húsinu,“ segir Kristinn.

Þrír létust í eldsboðaHús í Vesturbæ Reykjavíkur brann til kaldra kola 25. júní síðastliðinn. Þrír brunnu inni.

Mynd: Davíð Þór

„Það er líklega staðan, að hann hafi bara kveikt í herberginu sínu og labbað út og fór upp á sendiráðinu, og ég er með myndband og allt sem er búið að senda mér. Þetta skal ég birta eftir helgina. Þetta er ansi óréttlátur fréttaflutningur sem er í gangi.“

Pólverjar „borga betur“

Alls eru 73 einstaklingar skráðir með lögheimili í húsinu. Aðspurður hvort fyrirtæki sæi um útleigu á herbergjum hússins svarar Kristinn neitandi. „Það var engin verkleiga eða neitt þarna, ég var bara að leigja á eigin vegum. Og ég yfirleitt leigi Pólverjum því að ég er búinn að vera að vinna með Pólverjum og flutti inn Pólverja hérna þegar ég var að byrja með staðina mína. Mér finnst þetta gott fólk til að vera og búa með. Og ástæðan fyrir því að ég leigi þeim miklu frekar en Íslendingum er bara því þeir koma betur fram, ganga betur um og borga betur.“

„Mér finnst þetta gott fólk til að vera og búa með“

Kristinn vill ekki tjá sig frekar um málið en segir að nýlegar myndir af innviðum húsins sýni hvernig það var endurinnrétt nýlega. „En eins og þetta er núna þá er mér ráðlagt af öllum að svara ekki fréttamönnum,“ segir hann og bætir við að lokum: „En algjör harmleikur.“

Annað hús félagsins rýmt í júní

Jón Viðar Matthíasson, slökkviliðsstjóri á höfuðborgarsvæðinu, sagði að það hefði komið á óvart hversu ákáfur og útbreiddur eldurinn var þegar slökkviliðið mætti á staðinn. „Svo náttúrulega þegar maður fer að rýna í þetta í dag þá kemur í ljós að húsið er einangrað með sagi að hluta til og það hefur töluvert að segja.“ Taldi hann eigendur hefðu ekki uppfyllt skyldur sínar.

Húsið að Bræðraborgarstíg 1 er í eigu félagsins HD verk ehf, sem aftur er í eigu félagsins H2o ehf. Það félag á Kristinn að fullu. HD verk á einnig húsið að Bræðraborgarstíg 3, þar sem rekið hefur verið gistiheimili sem áður hefur verið til umfjöllunar í Stundinni. Þess ber þó að geta að þegar Stundin fjallaði um gistiheimilið að Bræðraborgarstíg árið 2015 var félagið HD verk ehf í eigu annarra aðila en Kristins Jóns.

Þá á félagið HD verk ehf einnig fasteignir að Dalvegi 24 og 26, Hjallabrekku 1 og Kársnesbraut 96-A. Í fréttum RÚV kemur fram að slökkvilið höfuðborgarsvæðisins hafi látið rýma Dalveg 24 fyrir þremur vikum vegna ófullnægjandi brunavarna. Efling stéttarfélag hefur haft húsið að Bræðraborgarstíg og einnig húsnæðið að Dalvegi til skoðunar en þar munu starfsmenn starfsmannaleigu sem áður hét Menn í vinnu hafa haft búsetu. Hið sama á við um húsnæðið að Hjallabrekku en þar bjuggu fjölmargir erlendir verkamenn, sem grunur lék á að væru hér á landi í vinnumansali hjá Mönnum í vinnu.

Auk einstaklinganna þriggja sem létust særðust þrír til viðbótar. Einn karlmaður á sjötugsaldri er í haldi lögreglu og var úrskurðaður fyrr í dag í sjö daga áframhaldandi gæsluvarðhald á grundvelli almannahagsmuna. Alþýðusamband Íslands hefur kallað eftir ítarlegri rannsókn á málinu, en sambandið vill að atvinnurekendur séu kallaðir til ábyrgðar í málinu.