Ásgerður Halldórsdóttir, bæjarstjóri á Seltjarnarnesi, vill að stjórnvöld grípi inn í áætlanir Reykjavíkurborgar um gönguljós við Eiðsgranda. Hún telur borgina „meðvitað og ítrekað að þrengja að aðgengi að Seltjarnarnesi“ með því að lækka hámarkshraða, setja upp stoppistöðvar strætisvagna og breyta gatnamótum í miðborginni.

Þetta kemur fram í Morgunblaðinu í dag. Sigurborg Ósk Haraldsdóttir, borgarfulltrúi og formaður skipulags- og samgönguráðs, greindi frá því í blaðinu fyrir helgi að borgin hygðist leggja sex ljósastýrðar gönguþveranir yfir Eiðsgranda, aðra af tveimur götum sem leiða umferð frá Reykjavík til Seltjarnarness. Bæjarfulltrúar hafa áður gagnrýnt borgina fyrir að setja stoppistöð án útskots við tvíbreiðu götuna Geirsgötu í miðborginni. Vigdís Hauksdóttir, borgarfulltrúi Miðflokksins, kallaði einnig framkvæmdina „eins konar hryðjuverk gegn fjölskyldubílnum“.

„Við upplifum þetta sem yfirgang af hálfu Reykjavíkurborgar,“ segir Ásgerður. „Stjórnvöld verða að grípa inn í og tryggja að ekki verði hróflað við þjóðvegum og stofnbrautum nema með samþykki og í góðri sátt við þau sveitarfélög sem hagsmuna hafa að gæta.“

„Reykjavíkurborg er meðvitað og ítrekað að þrengja að aðgengi að Seltjarnarnesi“

Hún segir Seltjarnarnes í varnarbaráttu með samgöngumál til og frá bænum. „Við getum ekki á neinn hátt sætt okkur við að ítrekað og án samráðs sé þrengt að okkar stofnbrautum,“ segir hún. „Í ljósi þessa hef ég óskað eftir fundi með forstjóra Vegagerðarinnar til að ræða þessi mál. Reykjavíkurborg er meðvitað og ítrekað að þrengja að aðgengi að Seltjarnarnesi. Er það meðal annars gert með lækkun á hámarkshraða á Hringbraut niður í 40 km/klst, lengingu á ferðatíma fólks með ósamstilltum ljósum, strætóstoppistöð á miðri Geirsgötu og breytingu á gatnamótum Lækjargötu og Geirsgötu. Ég skil ekki þetta samráðsleysi. Við viljum öll tryggja gott flæði á götum, skapa öryggi fyrir gangandi og hjólandi ásamt því að tryggja gott aðgengi fyrir slökkvi- og sjúkrabíla ef til rýmingar kemur. Samráð og samvinna skiptir öllu máli fyrir þá sem búa í Vesturbæ Reykjavíkur og á Seltjarnarnesi.“