Fjórtánda spurningaþrautin: Tíu spurningar og svörin eru hér fyrir neðan mynd af orðum prýddu brjósti.
Aukaspurningar tvær:
Hvað kallast fiskurinn á myndinni hér að ofan?
Og hver hefur þennan öfluga kjálka og á svo margar orður sem blika á myndinni hér ögn neðar?
En hér eru fyrst spurningarnar tíu:
1. Hvaða sýsla er milli Árnessýslu og Vestur-Skaftafellssýslu?
2. Fyrir rétt tæpu ári, eða síðla í júní 2019, var bandaríski einnar stjörnu hershöfðinginn L.L.Yeager skipaður yfir 40. fótgönguliðasveit Bandaríkjahers, fræga herdeild sem barist hefur í mörgum styrjöldum fyrir Bandaríkin. Þótt orðspor Yeagers innan hersins væri gott, þá vakti þessi skipan samt töluverða athygli, sem sé að slíkur hershöfðingi skyldi skipaður yfir raunverulega bardagasveit? Hvað var merkilegt við skipan Yeagers?
3. Hver er Elena Greco, sem er ítölsk þótt nafnið virðist kannski grískt?
4. Spænska veikin, hræðileg drepsótt sem kom upp 1918, var kölluð svo vegna þess að framan af var mest fjallað um farsóttina í spænskum blöðum vegna þess að blöð í flestum öðrum Evrópulöndum voru ritskoðuð vegna heimsstyrjaldarinnar fyrri. Í raun var uppruni farsóttarinnar ekki á Spáni. Í hvaða landi er spænska veikin yfirleitt talin hafa verið upprunnin?
5. Hver skrifaði bækurnar „Horfðu á mig“ og „Ég man þig“?
6. Hvað heitir forseti Frakklands?
7. Rómverjar undir forystu Juliusar Caesars hernámu Gallíu eða Frakkland tæpum 50 árum fyrir Krists burð og þurftu mikið að hafa fyrir því. Síðan gekk á ýmsu, og lífið var til dæmis ekki auðvelt fyrir rómversku dátana í setuliðum virkisbæjanna Totorum, Aquarium, Laudanum and Compendium. Hvers vegna ekki?
8. Tónlistarmaður einn frá Bandaríkjunum fæddist 1992 og hefur meðal annars gefið út plötu um „dauðu gæludýrin sín“ eða svo mætti að minnsta kosti ætla af nafni plötunnar. Næsta plata tónlistarmannsins hét sakleysislegra nafni eða „Younger Now“ árið 2017. Hver er þessi tónlistarmaður?
9. „Pelle sigurvegari“ hét á íslensku kvikmynd sem frumsýnd var fyrir 33 árum. Hver var leikstjóri hennar?
10. Hver er núverandi heimsmeistari í Formúlu 1 kappakstri?
Þá eru þau hér þau hin tíu svör:
1. Rangárvallasýsla.
2. Laura L. Yeager er fyrsta konan sem skipuð er hershöfðingi yfir fullbúna bardagasveit.
3. Helsta söguhetjan í Napólí-bálki rithöfundarins Elenu Ferrante um framúrskarandi vinkonu og fleira.
4. Bandaríkjunum.
5. Yrsa Sigurðardóttir.
6. Emmanuel Macron.
7. Vegna þess að þeir þurftu að gæta Gaulverjabæjar, þar sem Ástríkur og Steinríkur (Asterix og Obelix) bjuggu og fóru jafnan sínu fram.
8. Miley Cyrus.
9. Billie August.
10. Lewis Hamilton.
Aukaspurningarnar:
Fiskurinn heitir hvalháfur eða hvalhákarl.
Sá orðumprýddi er rússneski marskálkurinn Georgí Sjúkov.
Ýmsir eiga svo eftir að svara næstu spurningaþraut á undan, en örvæntið eigi, því hana er að finna hér.
Athugasemdir