Fyrirtækið Skeljungur er hætt við að nýta sér ríkisaðstoð í gegnum hlutabótaleiðina og mun endurgreiða það sem ríkið hefur greitt vegna starfsmanna félagsins í aprílmánuði, samkvæmt yfirlýsingu sem framkvæmdastjóri félagsins, Árni Pétur Jónsson, sendi rétt í þessu.

Stundin greindi frá því í fyrradag og í gær að hlut­haf­ar fé­lags­ins hefðu fengið 600 millj­ón­ir króna í arð frá fé­lag­inu og að sex dög­um síðar hafi starfs­menn Skelj­ungs verið settir á  hluta­bóta­leið­ina.

Í yfirlýsingunni nú segir að Skeljungur bjóði „öllum starfsmönnum sínum 100% vinnu og endurgreiði Vinnumálastofnun“.

„Í fjölmiðlum í dag hefur verið fjallað um kostnað ríkissjóðs vegna þeirra starfsmanna Skeljungs sem fengu hlutabótagreiðslur í apríl.   Að athuguðu máli telur Skeljungur að ekki hafi verið rétt að nýta úrræðið.  Skeljungur mun því bjóða starfsmönnum sínum 100% vinnu frá og með 1. maí og endurgreiða Vinnumálastofnun allan þann kostnað sem til féll vegna starfsmanna Skeljungs í aprílmánuði.   Allir starfsmenn Skeljungs hafa nú verið færðir í 100% vinnuhlutfall og munu því ekki sækja frekari bætur til Vinnumálastofnunar.“