Aðkoman að Veganbúðinni í Faxafeni í morgun var óskemmtileg en einhverjir höfðu þá gert sér að leik að grýta eggjum í verslunina. Magnús Reyr Agnarsson, einn eigenda búðarinnar, segist vænta þess að einhver hafi verið að gera tilraun til að vera fyndinn, frekar en að um andúð á veganisma og einhvers konar mótmæli gegn honum sé að ræða. 

Aðkoman í morgun var með þeim hætti að eggjum hafði verið kastað í rúður búðarinnar og tómur eggjabakki lá á stéttinni. Eftir því sem Magnús best vissi, þegar Stundin ræddi við hann, höfðu ekki orðið skemmdir á húsnæðinu, einungis óþrifnaður. Sagði hann að þetta væri í fyrsta skipti sem þau hefðu orðið fyrir einhverju ónæði en Veganbúðin var opnuð í Faxafeni fyrir um tveimur vikum. 

„Þetta eru vænti ég einhverjir unglingar að reyna að vera fyndnir, ég gef mér það. Það voru einhverjir unglingar sem komu í búðina í gær og voru að að reyna að vera sniðugir og ætli þetta séu ekki bara þeir. Við höfum ekki áður lent í beinum skemmdarverkum eða öðru í þeim dúr, þessi fíflaskapur er það fyrsta sem við höfum lent í. Auðvitað er ómögulegt að segja hvort það búi eitthvað meira að baki en mér þykir það þó ólíklegt í þessu tilviki,“ segir Magnús.

Hann segir að afar vel hafi gengið í rekstrinum síðan búðin opnaði. Hún var áður í formi netverslunar og opin á laugardögum í Hafnarfirði en það húsnæði var orðið allt of lítið. „Það er búið að vera margfalt meiri aðsókn en við gerðum ráð fyrir og við þurfum bara að gæta að því að birgja okkur upp, til að eiga nóg af vörum, því það gengur svo hratt á þetta.“