Efling stéttarfélag hefur sent Degi B. Eggertssyni borgarstjóra tilboð um að verkfallsaðgerðum félagsins verði frestað í tvo sólarhringa. Til þess að af því megi verða þurfi Dagur hins vegar að staðfesta svokallað „Kastljóstilboð“ sitt skriflega. Slíkt tilboð myndi þýða að grunnlaun allra Eflingarfélaga myndu hækka um á bilinu 100 til 110 þúsund krónur á samningstímanum.

Með tilboði sínu sendi Efling skjal með samkomulagi til handa Degi, fyrir hönd Reykjavíkurborgar. Í því er tiltekið að borgin og Efling geri með sér samkomulag um að allir félagsmenn Eflingar hækki um 100 til 110 þúsund krónur í grunnlaunum á samningstímanum, þeir sem lægst hafi launin hækki mest og og þeir sem séu í hærri launaflokkum fá minni hækkun. Umrætt samkomulag muni hins vegar ekki snúast um aðrar greiðslur en grunnlaun, til að mynda nái það ekki til sérgreiðslna, uppbóta og álagsgreiðslna.

Ef borgarstjóri staðfestir tilboðið með undirskrift sinni þýðir það að hefja þarf samningaviðræður um önnur atriði. Verkfalli Eflingar yrði frestað frá því á miðnætti aðfararnótt miðvikudags, í kvöld, og til miðnættis á fimmtudag, eða í tvo sólarhringa. Starfsfólk Eflingar kæmi þá aftur til vinnu þessa daga.

Tilboðið var sent Degi klukkan ellefu í morgun og gefinn var frestur til svars til klukkan fjögur í eftirmiðdaginn. Pétur Krogh Ólafsson, aðstoðarmaður borgarstjóra, sagði í samtali við Stundina klukkan 11:30 að reglulegir fundir stæðu yfir í ráðhúsinu og því væri ekki búið að skoða tilboð Eflingar og því væri ekki hægt að gefa neitt út um afstöðu borgarinnar gagnvart því.