Vigdís Erlingsdóttir, íbúi á Flateyri, segist ekki hafa séð nokkra konu sterkari en móðir stúlkunnar sem bjargað var úr snjóflóðinu sem féll á Flateyri í nótt sem leið. Vigdís sinnti móðurinni og börnum hennar tveimur á meðan að leitað var að elstu dótturinni í sem lenti í flóðinu. Hún fannst heil á húfi og er fjölskyldan öll komin til Ísafjarðar til aðhlynningar en varðskipið Þór flutti þau þangað í morgun.

Tvö stór snjóflóð féllu á Flateyri á tólfta tímanum í gærkvöldi. Annað flóðið lenti á íbúðarhúsi við Ólafstún, þar sem hún býr ásamt börnum sínu. Hún komst af sjálfsdáðum út úr húsinu með yngri börnin tvö en elsta dóttirin grófst undir flóðinu. Björgunarsveitarfólk úr björgunarsveitinni Sæbjörgu á Flateyri komu strax á staðinn og grófu stúlkuna upp úr flóðinu um það bil hálftíma eftir að það féll.

Móðirin birti í nótt færslu á Facebook þar sem hún greindi frá því að snjóflóðið hefði fallið á hús fjölskyldunnar og elsta dóttir hennar grafist undir flóðinu. Björgunarsveitin Sæbjörg hefði hins vegar komið fljótt á staðinn og grafið hana upp. Hún væri heil á húfi. „Kraftaverk að ekki fór verr,“ skrifar móðirin.

„Þegar stúlkan svo fannst þá þyrmdu yfir mann tilfinningar sem er bara erfitt að koma í orð“

Móðir stúlkunnar birti svo aðra færslu nú í morgun þar sem hún ítrekaði að dóttir hennar væri í lagi, bara með nokkrar skrámur. „Hún var í 40 mínútur grafin undir snjónum og mun ég vera ævinlega þakklát björgunarsveitinni á Flateyri fyrir snör handtök við að grafa hana upp. Eins öðrum Flateyringum sem hlúðu að okkur krökkunum og sáu til þess að okkur væri hlýtt og buðu fram opin faðm sinn. Auðvitað áhöfn varðskipsins, læknum og og öllum sem stukku til.“

Erfitt að koma tilfinningum í orð

Vigdís ErlingsdóttirVigdís segir erfitt að koma tilfinningum í orð eftir atburði gærkövldsins.

Mynd: Úr einkasafni

Vigdís tók á móti móðurinni og yngri börnum hennar tveimur og var með þeim á meðan að elstu dótturinnar var leitað. Spurð hvort það hafi ekki tekið mikið á fjölskylduna að bíða í óvissu á meðan leitin stóð segir Vigdís að auðvitað hafi það verið en að sama skapi hafi þau sýnt ótrúlegt hugrekki. „Þetta eru ofsalega sterkir karakterar, það er í raun lyginni líkast.  Sterkari konu hef ég aldrei séð en þetta er auðvitað mikið sjokk samt sem áður. Þegar stúlkan svo fannst þá þyrmdu yfir mann tilfinningar sem er bara erfitt að koma í orð. Þakklæti er þar auðvitað efst í huga.“

Vigdís segir að hún eigi erfitt með að koma tilfinningum sínum í orð eftir atburði gærkvöldsins. „Ætli ég sé nokkuð búin að átta mig á þessu almennilega. Hugurinn leitaði vissulega ansi stíft aftur aldarfjórðung aftur í tímann. Það er ofboðslega erfitt að lýsa þessum tilfinningum og ég held að sjokkið komi yfir okkur í dag, í nótt voru allir uppteknir af verkefnum næturinnar. Hins vegar sluppu allir við meiðsl og líkamstjón og þá skiptir annað ekki máli.“