Gunnar Bragi Sveinsson, utanríkisráðherra, hefur tekið afstöðu gegn tillögu sem liggur fyrir á alþjóðaþingi mannréttindasamtakanna Amnesty International. Alþjóðaþingið fer fram nú um helgina og þar verður til umræðu hvort eigi að afglæpavæða vændi, kaup, sölu, milligöngu um vændi og rekstur vændishúsa. 

Gunnar Bragi tjáir sig um málið á Facebook síðu sinni í dag. Þar segist hann vera hugsi yfir tillögunni. Sú leið sem lögð er til sé farin í Hollandi og Þýskalandi „þar sem vændisiðnaðurinn blómstar og mansal er áfram vandamál,“ segir hann og spyr: „Er það slíkt sem heimsbyggðin þarfnast?“
Þá segir hann að sænska leiðin, sem farin er hér á landi, að gera sölu á vændi löglega en kaup og milligöngu um vændissölu ólöglega, sé ekki gallalaus. „En forsendurnar eru skýrar, að banna vændiskaup en ekki að refsa þeim sem neyðast til að stunda vændi. Vændi er ekki atvinnugrein og á ekki að fá að þrífast sem slík. 

Mér finnst hryggilegt til þess að hugsa að á sama tíma og við hvetjum karla um allan heim til að leggja sitt af mörkum til ‪#‎heforshe‬ og koma í veg fyrir ofbeldi gegn konum og tryggja kynjajafnrétti þá skulu ein stærstu og virtustu mannréttindasamtök heims leggja þessar tillögur fram.“

Áður hafði stjórn Vinstri grænna skorað á Íslandsdeild Amnesty International að beita sér gegn samþykkt tillögunnar á þeim forsendum að norræna leiðin sé þekkt um allan heim sem sú árangursríkasta og réttlátasta í baráttunni gegn vændi og mansali. „Jafn­rétt­is­nefnd Evr­ópuþings­ins hef­ur mælst til þess að aðild­ar­lönd­in fari þessa leið eft­ir að hafa gert út­tekt á ólík­um leiðum.“

Í yfirlýsingu þeirra var bent á að lög um bann við kaupum á vændi voru samþykkt árið 2009 af fulltrúum allra flokka nema Sjálfstæðisflokksins. „Lög um bann við kaup­um á vændi voru samþykkt árið 2009 af full­trú­um allra flokka á Alþingi utan eins. Laga­setn­ing­in var póli­tísk yf­ir­lýs­ing gegn kaup­um á lík­ama fólks í kyn­ferðis­leg­um til­gangi, til að draga úr eft­ir­spurn og til að tryggja rétt­ar­stöðu og þjón­ustu við vænd­is­fólk. Kann­an­ir hafa sýnt að meiri­hluti lands­manna, karla og kvenna og fólks úr öll­um flokk­um er hlynnt þeirri leið sem þar var far­in.“

Stundin birti í gær bréf frá íslenskri konu sem var í vændi og lýsti þeirri reynslu um leið og hún biðlaði til Íslandsdeildarinnar að andmæla tillögunni.