Útlendingastofnun lýsir því yfir í dag að albönsku fjölskyldurnar, sem fluttar voru úr landi í gær með langveik börn, hafi sjálfar óskað eftir brottflutningnum. Hermann Ragnarsson, vinnuveitandi og félagi annars fjölskylduföðurins, segir að yfirlýsing stofnunarinnar gefi einfaldaða og villandi mynd af raunveruleikanum. 

Í nótt var Kastrijot Pepoj og fjölskylda hans sótt á heimili þeirra í Barmahlíð og flutt í lögreglufylgd í Leifsstöð. Þau höfðu flutt til Íslands vegna þess að Kastrijot varð fyrir skotárás og vegna veikinda þriggja ára sonar þeirra, Kevi, sem glímir við slímseigjusjúkdóm. Ósk þeirra var að verða fullgildir borgarar á Íslandi og fá læknisaðstoð fyrir Kevi.

Ólöf Nordal Innanríkisráðherra er farinn úr landi. Ekki hefur náðst samband við upplýsingafulltrúa ráðuneytisins.

Mynd: Sjálfstæðisflokkurinn á Facebook

Þótt Útlendingastofnun segi að fjölskyldan hafi sjálf beðið um að vera flutt úr landi segir það aðeins hluta af sögunni. Fjölskyldan stóð frammi fyrir þeirri stöðu að Útlendingastofnun var búin að tilkynna um brottvísun hennar úr landi og Kastrijot hafði verið sviptur atvinnuleyfi.

Hermann, sem hjálpaði fjölskyldunni að koma undir sig fótunum á Íslandi og reyndi að sannfæra Útlendingastofnun um að leyfa Kastrijot að starfa áfram hjá honum, segir að yfirlýsing Útlendingastofnunar sé villandi. Kastrijot hafði atvinnu- og dvalarleyfi til 15. nóvember síðastliðins.

Fjölskyldan bíður lögreglu „Ég er búin að gráta í þrjá daga,“ sagði Xhulia í nótt þar sem hún beið lögreglunnar.

Mynd: Kristinn Magnússon

„Þau hefðu ekki neitt leyfi til að vinna eða neitt. Hann var búinn að missa atvinnuleyfið og fékk því ekki framlengt. Ég gat ekkert haft hann í vinnu, þótt ég vildi það og þótt ég hefði talað við Útlendingastofnun. Ég gat ekki skilað staðgreiðslunni af honum, því kennitalan var orðin óvirk. Hann var neyddur til að fara úr landi.“

Yfirlýsing Útlendingastofnunar Mbl.is birti yfirlýsingu Útlendingastofnunar fyrr í dag.

Mynd: Mbl.is

Útlendingastofnun útskýrir í yfirlýsingu sinni hvers vegna fjölskyldunni, og annarri albanskri fjölskyldu í sambærilegri aðstöðu, hefði verið synjað um hæli. „Til þess að eiga rétt á alþjóðlegri vernd og eiga rétt á hæli að lögum og samkvæmt alþjóðasáttmálum þarf fólk að vera í einhvers konar hættu og eiga ekki möguleika á viðunandi vernd og úrræðum í heimalandi sínu. Þetta leiðir bæði af Flóttamannasáttmála Sameinuðu þjóðanna og íslenskum lögum sem sett eru á grundvelli hans. Efnahagslegar aðstæður fela ekki í sér aðsteðjandi hættu, um það eru alþjóðasáttmálar og lög skýr. Því geta slíkar aðstæður ekki verið grundvöllur verndar.“

Ekki tókst að ná sambandi við Ólöfu Nordal innanríkisráðherra í dag eða í gærkvöldi, eða aðstoðarmann hennar, eða upplýsingafulltrúa innanríkisráðuneytisins. 

Lýsingu á brottflutningi fjölskyldunnar má lesa hér.