Blaðaútgáfan Fótspor, sem gaf út 12 blöð um allt land þar til henni var lokað um helgina, hefur verið skráð sem eign barnsmóður útgáfandans frá upphafi.
Fram hefur komið að Ámundi Ámundason útgefandi hafi selt Vefpressunni og Birni Inga Hrafnssyni útgáfuréttinn á blöðunum tólf og sagt upp ritstjórum þeirra. Ritstjórarnir fengu vikuuppsagnarfrest, þar sem þeir voru verktakar.
Ámundi hefur verið skráður eigandi 100 prósent hlutafjár á vef Fjölmiðlanefndar, en eignarhaldið hefur hins vegar verið í höndum Kristínar Ástríðar Þorsteinsdóttur, bókara hjá vinnuvélasölunni Vélafli.
Ámundi ekki skráður eigandi
Samkvæmt ársreikningi ársins 2014 er eini eigandi félagsins Fótspor ehf., útgáfufélagi blaða svo sem Reykjavík Vikublað og Akureyri Vikublað, Kristín Ástríður Þorsteinsdóttir, en ekki Ámundi Ámundason. Líkt og greint hefur verið frá í fjölmiðlum keypti Vefpressan útgáfuréttindi á öllum tólf blöðum sem félagið hefur gefið út. Kristín starfar sem bókari hjá Vélafli og er barnsmóðir Ámunda. Hún hefur verið eini eigandi félagsins frá í það minnsta árinu 2003 en frá því ári er elsti aðgengilegi ársreikningur félagsins.
Samkvæmt heimasíðu Fótspors hóf fyrirtækið blaðaútgáfu á haustmánuðum 2008 og hefur Kristín því verið eini eigandi félagsins allan þann tíma sem fyrirtækið hefur stundað útgáfu. Í samtali við Stundina segist Kristín hafa selt félagið nýverið og sé fegin að vera laus við blöðin.
Athugasemdir