Þrír af fjórum fyrrverandi þingmönnum Bjartrar framtíðar hafa sagt skilið við flokkinn. Páll Valur Björnsson tilkynnti um ákvörðun sína í dag, en Róbert Marshall og Brynhildur Pétursdóttir skráðu sig úr flokknum þann 3. janúar, daginn sem flokkurinn hóf formlega stjórnarmyndunarviðræður við Viðreisn og Sjálfstæðisflokkinn.
Páll Valur útskýrir afstöðu sína í pistli. „Ég sé ekki að ég eigi lengur samleið með flokknum á þeirri leið sem hann er (ég á raunar eins og margir aðrir mjög erfitt með að átta mig á hvert flokkurinn stefnir og fyrir hvað hann stendur),“ skrifar hann og tekur fram að þegar Björt framtíð vilji ekki styðja frumvarp um að fella niður ritfangakostnað skólabarna taki steininn úr.
Ekkert samráð um að líma flokkinn við Viðreisn
Páll Valur telur stjórnarsamstarfið við Sjálfstæðisflokkinn glapræði, enda sé sá flokkur „gegnsýrður af sérhagsmunagæslu og spillingu“. Þá segist Páll ekki trúa því að undir stjórn Sjálfstæðisflokksins geti orðið verulegar breytingar til hins betra í þeim málum sem Björt framtíð hefur barist fyrir.
„Ég var (eins og allir vita) ekki sáttur við þá ákvörðun að líma Bjarta framtíð við Viðreisn í stjórnarmyndunarviðræðunum; flokk sem er leiddur af fólki sem hefur verið árum saman í hagsmunagæslu fyrir stór-atvinnurekendur,“ skrifar Páll. „Það var gert án nokkurs samráðs við bakland eða a.m.k. án alls samráðs við þá oddvita flokksins sem ekki náðu kjöri í kosningunum. Það sem hefur gerst eftir þessa stjórnarmyndun hefur ekki dregið úr þessum efasemdum mínum og áhyggjum, nema síður sé.“
Kosningaloforð Bjartrar framtíðar ekki efnd
Áður hafði komið fram í fjölmiðlum að Páll væri óánægður með ríkisstjórnarsamstarfið við Viðreisn og Sjálfstæðisflokkinn. Á meðal þess sem Páll Valur hefur gagnrýnt er að flokkurinn hafi gefið of mikið eftir í Evrópumálum, auðlinda- og umhverfismálum og að því er varðar málefni barna.
Á meðal helstu kosningamála Bjartrar framtíðar í aðdraganda síðustu þingkosninga var að vinnubrögð í íslenskum stjórnmálum yrðu bætt, fram færi þjóðaratkvæðagreiðsla um framhald aðildarviðræðna við Evrópusambandið, fjárfestingar hins opinbera í innviðum yrðu auknar til muna, farin yrði markaðsleið í sjávarútvegi, útgjöld yrðu aukin til mennta- og heilbrigðismála og slegin yrði skjaldborg um umhverfið, meðal annars hálendi Íslands.
Ríkisstjórn Sjálfstæðisflokksins, Bjartrar framtíðar og Viðreisnar kynnti stefnuyfirlýsingu sína þann 10. janúar síðastliðinn. Þar er hvorki að finna fyrirheit um að boðað verði til þjóðaratkvæðagreiðslu um framhald aðildarviðræðna við Evrópusambandið né að látið verði reyna á uppboðsleið í sjávarútvegi á kjörtímabilinu.
Fram hefur komið í viðtölum við formenn stjórnarflokkanna að með stjórnarsáttmálanum hafi þingflokkarnir skuldbundið sig til að koma í veg fyrir að fram fari þjóðaratkvæðagreiðsla um framhald aðildarviðræðna við Evrópusambandið á kjörtímabilinu, nema þá undir lok þess.
Nýlega kynnti ríkisstjórnin fjármálaáætlun þar sem menntakerfinu, einkum háskólastiginu, eru settar þröngar skorður auk þess sem útgjöld til heilbrigðismála eru aukin miklu minna en kallað var eftir fyrir kosningar.
Alþýðusamband Íslands og forstjóri Landspítalans hafa lýst yfir áhyggjum af því að spítalinn verði verulega undirfjármagnaður. Þá nemur áformuð fjölgun hjúkrunarrýma fram til ársins 2022 aðeins rúmlega helmingunum af áætlaðri viðbótarþörf fyrir ný hjúkrunarrými til ársins 2020.
„Ekki er að sjá þess merki að gert sé ráð fyrir viðbótarfjármagi til reksturs hjúkrunar- og endurhæfingarþjónustu á tímabilinu þrátt fyrir fyrirséða fjölgun aldraðra og viðvarandi rekstarvanda margra stofnanna,“ segir í fréttatilkynningu frá ASÍ sem birtist í síðustu viku.
ACD-ríkisstjórnin
„Fáránleika-raunsæi eða raunsæislegur fáránleiki“
Ráðherra braut lög þegar hann setti rektor án auglýsingar
Unnu náið með hæstaréttardómurunum meðan þeir dæmdu Arnfríðarmál
Þorsteinn: Jafnvel enn alvarlegra en málið sem varð síðustu ríkisstjórn að falli
Frumgjöld verða 35 milljörðum hærri á næsta ári heldur en fyrri ríkisstjórn stefndi að
Athugasemdir