Stundin fær flestar tilnefningar til blaðamannaverðlauna Íslands af öllum miðlum landsins fyrir síðasta ár. Tilkynnt var um tilnefningarnar um miðnætti.
Alls fær Stundin þrjár tilnefningar í flokkunum: Rannsóknarblaðamennska ársins, blaðamannaverðlaun ársins og viðtal ársins.
Fréttablaðið, Morgunblaðið og RÚV fá tvær tilnefningar hver miðill, Kjarninn eina, Vísir.is eina og DV eina.
Ingibjörg Dögg Kjartansdóttir, annar ritstjóra Stundarinnar, er tilnefnd til blaðamannaverðlauna ársins fyrir „fjölbreytta og mikilvæga umfjöllun um kynbundið ofbeldi“.
Í rökstuðningi dómnefndar segir: „Í fjölmörgum greinum gaf Ingibjörg þolendum kynbundins ofbeldis og kynferðisbrota vettvang að tjá sig um sína upplifun af brotunum, upplýsti um hve víða í samfélaginu þessi brot er að finna og hversu erfitt er fyrir fórnarlömb að leita réttlætis vegna þeirra.“
Ingi Freyr Vilhjálmsson blaðamaður er tilnefndur fyrir „afhjúpandi umfjöllun sína um fjárhagsleg tengsl Illuga Gunnarssonar menntamálaráðherra og eignarhaldsfélags hans OG Capital við fyrirtækið Orka Energy.“ Í rökstuðningi segir: „Í ljós komu verulegir hagsmunaárekstrar vegna samstarfssamnings íslenskra og kínverskra stjórnvalda í orkumálum sem Orka Energy var aðili að og ráðherrann ritaði undir.“
Reynir Traustason er tilnefndur í flokknum viðtal ársins fyrir viðtal við Ástu Kristínu Andrésdóttur hjúkrunarfræðing sem sökuð var um manndráp af gáleysi. Í rökstuðningi segir: „Reynir gerir lífshlaupi Ástu Kristínar góð skil og fær viðmælanda til að tala mjög opinskátt um hvernig þessi atburður hefur markað líf hennar, hvernig hún hefur barist við kvíða og reynt að viðhalda lífsviljanum.“
Fyrri tilnefningar blaðamanna Stundarinnar
Þetta er í fjórða sinn sem þau Ingibjörg Dögg og Ingi Freyr eru tilnefnd til blaðamannaverðlauna. Ingibjörg Dögg var einnig tilnefnd í fyrra, þá í flokknum umfjöllun ársins fyrir greinaröð um alzheimer og heilabilun. Árið 2011 var hún tilnefnd sem blaðamaður ársins fyrir fjölbreytt og mikilvæg skrif um samfélagsvandamál, svo sem ofbeldi, einkum er vörðuðu hlutskipti kvenna. Árið 2010 vann hún til verðlauna í flokki rannsóknarblaðamennsku „fyrir áleitna og vandaða umfjöllun um kynferðisbrotamál og forystu um skrif á þessu sviði, svo sem um biskupsmálið og önnur meint kynferðisbrot innan kirkju og trúfélaga.“
Ingi Freyr var tilnefndur sem blaðamaður ársins 2012 fyrir umfjöllun um fiskveiðar Íslendinga við Afríku og ýmis skrif um viðskipti og uppgjör í kjölfar hrunsins. Áður hafði hann tvisvar verið tilnefndur fyrir rannsóknarblaðamennsku. Annars vegar fyrir umfangsmikinn og ágengan fréttaflutning af uppgjöri og afleiðingum fjármálahrunsins árið 2011. Hins vegar fyrir skrif um kúlulán og fjölmargar afhjúpandi fréttir um viðskiptahætti auðmanna og stórfyrirtækja í aðdraganda og eftirmála hrunsins árið 2009.
Reynir Traustason var verðlaunaður fyrir umfjöllun ársins 2003, fyrir frumkvæði og heildstæða umfjöllun um rannsókn Samkeppnisstofnunar á samráði olíufélaganna. Sama ár var hann einnig tilnefndur til blaðamannaverðlauna ársins.
Þá unnu þeir Jóhann Páll Jóhannsson og Jón Bjarki Magnússon, sem nú skrifa fyrir Stundina, til verðlauna árin 2013 og 2014. Fyrri verðlaunin fengu þeir í flokki rannsóknarblaðamennsku fyrir upplýsandi og athyglisverða umfjöllun um hælisleitendur og fyrir að fylgja því vel eftir hvort mögulega hefði verið brotið á réttindum einstaklinga í hópi þeirra. Árið 2014 fengu þeir síðan blaðamannaverðlaun ársins fyrir umfjöllun um lekamálið. Í rökstuðningi dómnefndar sagði að þeir hefðu sýnt „einstakt þolgæði við að upplýsa allar hliðar lekamálsins svokallaða og [fylgt] málinu vel eftir, þrátt fyrir mikið mótlæti og andstöðu ráðherra , sem endaði með afsögn hans.“
Tilnefningarnar í heild:
Viðtal ársins 2015
Helgi Bjarnason, Morgunblaðinu. Fyrir viðtal við Þröst Leó Gunnarsson um sjóslysið úti af Aðalvík í júlí í fyrrasumar. Þresti Leó tókst fyrir snarræði að bjarga tveimur félögum sínum en sá þriðji fórst. Björgunartæki brugðust gersamlega og fær Helgi einstæðar lýsingar Þrastar Leó á hugarástandi
þremenninganna á meðan þeir biðu björgunar.
Reynir Traustason, Stundinni. Fyrir viðtal við Ástu Kristínu Andrésdóttur hjúkrunarfræðing sem sökuð var um manndráp af gáleysi. Reynir gerir lífshlaupi Ástu Kristínar góð skil og fær viðmælanda til að tala mjög opinskátt um hvernig þessi atburður hefur markað líf hennar, hvernig hún hefur barist við kvíða og reynt að viðhalda lífsviljanum.
Snærós Sindradóttir, Fréttablaðinu. Fyrir viðtal við Einar Zeppelin Hildarson, ungan mann, sem á að baki afar erfiða lífsreynslu. Einar segir á einlægan hátt frá örlagadeginum þegar mamma hans varð systur hans að bana en sjálfur slapp hann slasaður frá hildarleiknum. Snærós segir áhrifamikla sögu manns og dregur fram mikla þrautseigju, góða mannkosti og kærleika.
Umfjöllun ársins 2015
Gísli Einarsson, Ingólfur Bjarni Sigfússon, Karl Sigtryggsson og Ragnar Santos, fréttastofu RÚV. Fyrir umfjöllun um flóttamannavandann sem geisar í Evrópu. Með innlendu sjónarhorni á björgunarstörf áhafnar Týs á Miðjarðarhafi og viðtölum við fórnarlömb á vergangi í Ungverjalandi og Líbanon fengu landsmenn mikilsverða innsýn inn í erfiða ferð flóttamanna í leit að öryggi.
Helgi Seljan, Kastljós RÚV. Fyrir umfjöllun um nauðganir, áreitni og ofbeldi gagnvart þroskahömluðum konum. Ljóstrað var upp um sinnuleysi yfirvalda sem héldu ekki hlífiskildi yfir konunum, settu ekki reglur um umönnun þeirra og hunsuðu kvartanir. Af virðingu og með áhrifaríkum hætti var saga kvennanna sögð og sjónarmiði þeirra komið á framfæri.
Kristjana Björg Guðbrandsdóttir og Viktoría Hermannsdóttir, Fréttablaðinu. Fyrir ítarlega umfjöllun um mansal þar sem fjallað var um umfang og einkenni mansals á Íslandi og bresti í aðgerðaráætlun stjórnvalda. Fréttaskýringaröð þeirra varpaði ljósi á vaxandi mansalsvanda hér á landi þar sem einstaklingar eru misnotaðir í kynferðislegum tilgangi, til nauðungarvinnu eða í glæpastarfsemi.
Blaðamannaverðlaun ársins 2015
Hörður Ægisson, DV. Fyrir skýra og greinagóða umfjöllun um slitabú föllnu bankana, vogunarsjóðina sem þá keyptu sem og útgöngusamninga þeirra við íslensk stjórnvöld. Hörður hefur upplýst stöðu mála af djúpri þekkingu og nákvæmni í máli sem hefur rík áhrif á þjóðarbúið.
Ingibjörg Kjartansdóttir, Stundinni. Fyrir fjölbreytta og mikilvæga umfjöllun um kynbundið ofbeldi. Í fjölmörgum greinum gaf Ingibjörg þolendum kynbundins ofbeldis og kynferðisbrota vettvang að tjá sig um sína upplifun af brotunum, upplýsti um hve víða í samfélaginu þessi brot er að finna og hversu erfitt er fyrir fórnarlömb að leita réttlætis vegna þeirra
Sunna Ósk Logadóttir, Morgunblaðið/mbl.is. Fyrir áhrifamikla umfjöllun um heimsókn sína til Líbanon þar sem hún ræddi við sýrlenska flóttamenn og starfsmenn flóttamannabúða til að kynna sér aðstæður þeirra flóttamanna sem veitt hafði verið hæli á Íslandi.
Rannsóknarblaðamennska ársins 2015
Ingi Freyr Vilhjálmsson, Stundinni. Fyrir afhjúpandi umfjöllun sína um fjárhagsleg tengsl Illuga Gunnarssonar menntamálaráðherra og eignarhaldsfélags hans OG Capital við fyrirtækið Orka Energy. Í ljós komu verulegir hagsmunaárekstrar vegna samstarfssamnings íslenskra og kínverskra stjórnvalda í orkumálum sem Orka Energy var aðili að og ráðherrann ritaði undir.
Kolbeinn Tumi Daðason 365 miðlum. Fyrir uppljóstrandi umfjöllun um óánægju lögreglumanna með störf lögreglufulltrúa í fíkniefnadeild og alvarlegar ásakanir samstarfsfélaga hans vegna gruns um tengsl hans við fíkniefnaheiminn. Upphaf umfjöllunarinnar var tálbeituaðgerð við Hótel Frón sem fór út um þúfur.
Magnús Halldórsson, Kjarnanum. Fyrir ítarlega umfjöllun um sölu á hlutum Landsbankans í Borgun í lokuðu söluferli og vísbendingar um að hlutur Landsbankans hafi verið seldur á undirverði m.a. í ljósi aðgreiðslna og því hafi ekki verið gætt að hagsmunum eigenda sem er almenningur í landinu.
Athugasemdir