Sólheimasafnið er falið á milli tveggja blokka í Sólheimum. Bókasafnið er athvarf gamla fólksins og barnanna í hverfinu, griðarstaður þar sem allir geta komið og fengið skjól, fræðslu og afþreyingu. Safnið er engu að síður í niðurníðslu, eins og sjá má á meðfylgjandi myndum og ástandið er svo slæmt að starfsmönnum þykir nóg um.
„Þetta er Borgarbókasafnið í Sólheimum, vinnustaðurinn minn en jafnframt bókasafnið í hverfinu mínu. Mér þykir voðalega vænt um þetta litla heimilislega hverfissafn sem á sér langa sögu. Þess vegna er svo sárt að sjá ástandið á húsinu, það er bókstaflega að hruni komið, það er fúið og lekur, það er vond lykt í því og hefur ekki verið málað í alltof mörg ár. Borgin reynir að slökkva elda með því að fylla í göt hér og þar, en það dugir ekki til,“ skrifaði Einar Björn Magnússon, starfsmaður bókasafnsins, á Facebook.
Fatan stendur á gólfinu
Stundin náði tali af Einari sem sagði að starfsmenn hefðu barist fyrir úrbótum í mörg ár og væru komnir að þolmörkum. „Við erum alveg búin að fá nóg. Ég finn það sjálfur hvað ég er orðinn þreyttur á þessu þegar það frussast yfir starfsfólk vatn þegar það stendur í afgreiðslunni.
Í rigningarveðrinu um daginn þurftum við að breiða yfir peningakassana og færa okkur frá því vatnið frussaðist inn,“ útskýrir Einar en núna stendur fata undir mesta lekanum og handklæði hefur verið breitt á gólfið.
Athugasemdir