Skákmönnum er misboðið vegna kostnaðar við laun Gunnars Björnssonar, forseta Skáksambands Íslands, sem námu samtals 9.472.754 krónum á síðasta ári. Það þýðir að launin, fyrir utan launatengdan kostnað sambandsins, séu á sjöunda hundrað þúsund krónur á mánuði.
Til samanburðar má nefna að heildargjöld félagsins fyrir það ár námu tæplega 47 milljónir og þar af voru styrkir til íslenskra skákmanna aðeins 1,4 milljónir. Stundin ræddi við skákmenn sem báðust undan að ræða málið undir nafni en sögðust þó allir að launin valdi mikilli gremju meðal skákmanna. Þeir segja að eðlilegra væri að sambandið styrkti unga skákmenn í meira mæli.
Gunnar segir í samtali við Stundina að framlag ríkisins hafi verið hækkað nýverið gagngert til að hægt væri að hafa starfsmann í fullu starfi. Hann telur laun sín eðlileg.
Hagnaður af Reykjavíkurskákmóti
Sé litið til sundurliðunar á útgjöldum Skáksambands Íslands sést að aðeins einn liður er hærri en laun og launatengd gjöld Gunnars og það er Reykjavíkurskákmótið. Í fyrra var kostnaður við Reykjavíkurskákmótið rétt ríflega 13 milljónir króna, samanborið við launakostnað vegna Gunnars sem nam ríflega 9 milljónum króna. Líkt og fyrr segir koma nær allar tekjur Skáksambands Íslands frá ýmist ríkissjóði eða Reykjavíkurborg. Í fyrra fékk félagið ríflega 23 milljónir í rekstrarstyrk af fjárlögum. Ágætis hagnaður var svo af Reykjavíkurskákmótinu en samtals námu tekjur af því ríflega 14 milljónum. Hæsti styrkurinn vegna mótsins kom frá Reykjavíkurborg, sex og hálf milljón, en N1 styrkti mótið auk þess um tvær milljónir. Árið 2014 var halli félagsins í heild 745.372 krónur.
Athugasemdir