Um það leyti sem Sigurður Ingi Jóhannsson, nýkjörinn formaður Framsóknarflokksins, bað flokksmenn á flokksþingi Framsóknar að haldast í hendur og láta „strauma framsóknarmennskunnar“ streyma um salinn í Háskólabíói fyrir skemmstu, svo þeir færu þaðan sem samstíga fjölskylda, yfirgaf Sigmundur Davíð Gunnlaugsson, fráfarandi formaður, salinn í nokkrum flýti. Á eftir honum hélt Jóhannes Þór Skúlason, aðstoðarmaður hans.
Sigmundur Davíð sagði við fréttamenn að hann hefði ekki búist við því að tapa kjörinu um formennsku í Framsóknarflokknum.
„Við sjáum bara til,“ svaraði hann, þegar hann var spurður hvað hann myndi gera í kjölfarið.Sigmundur tók því ekki þátt í hópefli því sem Sigurður Ingi lagði til í sigurræðu sinni. Þess í stað hélt hann áleiðis að Hótel Sögu og fór þangað inn. Á eftir honum stefndi Jóhannes Þór, aðstoðarmaður hans, sem hafði þó misst sjónar á honum fyrir utan Háskólabíó. „Veit einhver hvert húsbóndi minn fór?“ spurði Jóhannes fyrir utan.
Hróp gerð að Eygló
Strax í kjölfar þess að Sigurður Ingi Jóhannsson hafði sigrað Sigmund Davíð Gunnlaugsson í formannskjörinu var tilkynnt að frambjóðendur til varaformennsku myndu halda ræður. Eygló Harðardóttir, einn þriggja frambjóðenda, sem studdi Sigurð Inga til formennsku, bað um að fá að halda ræðu á undan Lilju Dögg Alfreðsdóttur, sem studdi Sigmund Davíð.
„Eins og oft vill verða þegar einstaklingar takast á um embætti, þá eigum við til að láta tilfinningarnar bera rökhyggjuna ofurliði. Það er því mjög eðlilegt að hér inni sé fólk sem finnur nú fyrir reiði og vonbrigðum,“ sagði Eygló í ræðu sinni. Skömmu síðar hrópaði flokksþingsgestur yfir salinn að Eygló: „Kjaftæði, þú ert ömurleg!“
Samkvæmt frásögn þingflokksformannsins Ásmundar Einars Daðasonar gekk Eygló á eftir Sigmundi Davíð Gunnlaugssyni á fundi framkvæmdastjórnar flokksins í fyrradag eftir að Sigmundur hafði slitið fundinum einhliða og sýnt „einræði“ og „hroka“ í umræðu um dagskrá flokksþingsins.
Athugasemdir