Róbert Smári Gunnarsson, 16 ára nemi og sonur Gunnars Braga Sveinssonar, sjávarútvegs- og landbúnaðarráðherra, kallar eftir því að ungu fólki sem lætur að sér kveða í þjóðmálaumræðunni á Íslandi sé sýnd meiri virðing. Þetta kemur fram í einlægum pistli eftir Róbert sem birtist á vef Framsóknarflokksins í dag.

„Mér líður stundum sem 16 ára ungum manni einsog litið sé niður til mín þegar ég tjái skoðanir mínar opinberlega. Eitt sinn var sagt við mig að ég ætti ekkert að vera tjá mig um hluti sem ég hefði ekkert vit á, sem dæmi,“ skrifar Róbert sem segist hafa gífurlegan áhuga á þjóðfélagsmálum og gjarnan vilja taka þátt í stjórnmálum af einhverju tagi í framtíðinni.

„„En hvenær ætti ég að þora því?“ er spurning sem veltur án efa á mörgu ungu fólki, og ég velti fyrir mér áður en ég sendi þessa grein. Hvað þarf maður að hafa til að geta farið út í pólitík, eða bara til að vera tekin sjálfsagður í umræðu um pólitík? Þarf ég að vera háskólagenginn, búinn að vera á vinnumarkaði í áratugi, kominn með maka og börn?“ spyr Róbert.

Þá rifjar hann upp að þegar Gauti Geirsson, 22 ára háskólanemi, var ráðinn sem aðstoðarmaður Gunnars Braga, föður Róberts, hafi ráðningin verið gagnrýnd harðlega á Facebook. Hið sama hafi verið uppi á teningnum þegar hin unga Jóhanna María Sigmundsdóttir settist á þing. „Þau voru tætt í sig meðal eldra fólks og sögð vera börn. Ég lít á þetta unga fólk sem ákveðna hvatningu, hvatningu til ungs fólks að láta í sér heyra, koma sínu á framfæri og láta gott af sér leiða,“ skrifar Róbert.

„Þegar einhver nær svona langt og fær gott tækifæri hjá stjórnvöldum er það virðingavert og mikið fagnaðarefni, og sýnir traust stjórnvalda til ungs fólks-, og vilja til að gefa ungu fólki tækifæri, en samt ná neikvæðu raddirnar of oft að verða háværastar. Getum við ekki breytt þessu þannig að ungt fólk verði tekið sem sjálfsögðum hlut í umræðunni líkt og þeir sem eldri eru? Það eiga allir sama rétt til að tjá sig, óháð aldri, búsetu, uppruna, efnahag og öðru.“