Í gærkvöld var fyrsti þáttur Múslimanna okkar sýndur á Stöð 2 þar Lóa Pind Aldísardóttur kynnist betur lífi íslenskra múslima. Viðbrögðin við þættinum, af hálfu þeirra sem hafa verið í umræðunni vegna mannréttindamála, eru misjöfn.

„Við hérna höfum engann áhuga að horfa á heilaþvott 365 fjölmiðla um musselmann (muslimar) sem hafa troðið sér upp í öllum kristnum löndum fyrir misnotkun á bótakerfinu sem þeirra hatursfulla heilbú getur ekki skapað í þeirra eigin muslima-löndum,“ skrifar söngkonan Leoncie við stöðufærslu sjómannasöngvarans Gylfa Ægissonar á Facebook um þáttinn.

Kvartar undan heilaþvætti

Gylfi var heldur ósáttur með orð sjónvarpskonunnar Lóu Pind í aðdraganda þáttarins en hún spurði í viðtali við Ísland í dag hvort það ætti að kasta fólki eins og Gylfa úr þjóðfélaginu fyrir að hafa óvinsælar skoðanir um samkynhneigða.

„Ég spyr Lóu að því hér og nú hvað meinar þú með "sömu skoðun og við"?. Er ég sá eini sem held því fram á Íslandi að gleðigangan hafi verið klámvædd í gegnum árin. Ég er sá eini sem hef sagt að Gleðiganga Hinsegin daga hafi verið heilaþvottastöð barna í gegnum árin og ég stend við það,“ spyr Gylfi og bætir við að hann muni mæta í næstu Gleiðgöngu ef Salmann Tamimi, formaður Félags múslima á Íslandi, komi með sér.

Ólíkt gildismat

Meðan Gylfi og Leoncie kvörtuðu undan þáttunum hrósaði Gústaf Níelsson, sem hrakinn var nýverið úr varamannssæti í mannréttindaráðs Reykjavíkurborgar, þáttunum og lagði til að þeir væru endursýndir í opinni dagskrá.

„Mér þótti áhugavert að horfa á þáttinn á Stöð2 „Múslimarnir okkar", sem sýndur var í kvöld. Vona ég að sem flestir Íslendingar hafi horft á þáttinn, því hann í reynd staðfestir að þetta ágæta fólk er ekki hér til þess að aðlagast menningu og siðum innfæddra. „Kokkurinn á Kleppsveginum" hafði þó lært til fullnustu listina að þurfa ekki að sjá fyrir sér og landaði auðvitað örorkubótum á besta aldri með hækjuna undir hönd; hann heldur þó áfram að senda peninga til Pakistan. Aðspurður um refsingar í íslam, eins og handaraflimun við þjófnaði, sagði hann refsingar á Íslandi ekki nógu strangar. Þáttargerðarkonan lét kyrrt liggja við slíkt svar,“ skrifar Gústaf á Facebook-síðu sína.