Vinsælasti tölvuleikur og mest notaða smáforrit heimsins í dag er leikurinn Pokémon Go. Út um alla borg má sjá fólk með augun límd við símana sína í stöðugri leit að Pokémon-skrímslum. Þessar gríðarlegu vinsældir hafa þó haft í för með sér óvæntar og óheppilegar uppákomur.
Helfararsafnið í höfuðborg Bandaríkjanna, Washington D.C. er svokallað PokéStop í leiknum, þar sem leikmenn geta fengið ókeypis varning til þess að nota við spilun. Alls eru þrjú PokéStop inni á safninu.
„Spilun þessa leiks er ekki viðeigandi á safninu sem er til minningar um fórnarlömb nasista,“ sagði Andrew Hollinger, samskiptafulltrúi Helfararsafnsins, í samtali við Washington Post sem fjallaði um málið. „Við erum að reyna að leita allra leiða til þess að fá safnið útilokað úr leiknum.“
Vandræði Helfararsafnsins undirstrika hvernig smáforrit sem samtvinnast raunveruleikanum geta skapað erfiðar aðstæður, sérstaklega þegar eigendur fasteigna og svæða í raunveruleikanum hafa ekkert með það að segja hvernig rými þeirra eru notuð í forritunum.
Óviðeigandi eiturgas
Mynd sem gengið hefur á samfélagsmiðlum sýnir leikmann sem fann óheppilega stafræna skepnu innan í safninu: Pokémon sem kallast Koffing og gefur frá sér eitrað gas birtist hjá skilti merktu sal Helenu Rubinstein. Í salnum eru kynntar frásagnir gyðinga sem lifðu af gasklefa nasista. Ekki hefur fengist staðfest hvort myndin er raunveruleg eða ekki, en Hollinger segist hafa áhyggjur af því að skepnan skuli láta sjá sig á safninu.
Fyrirtækið Niantic, sem stendur að baki leiknum, hefur ekki fengist til þess að svara spurningum um birtingu skrímslisins Koffing innan safnsins, eða því hvort einhver leið væri að verða við bón Helfararsafnsins um að koma í veg fyrir að Pokémonar geti skotið upp kollinum innan í byggingunni.
Hollinger hefur sagt safnið mjög fylgjandi því að gestir þess noti tækni til þess að auka á upplifun sína og deila reynslu sinni með öðrum en telur að leikurinn falli utan ramma þess sem viðeigandi er.
Athugasemdir