Halldór Ásgrímsson, fyrrverandi forsætisráðherra og formaður Framsóknarflokksins, lést á gjörgæsludeild Landspítalans í gærkvöldi, 67 ára að aldri. Morgunblaðið greindi frá þessu í morgun. Halldór fékk hjartaáfall aðfaranótt laugardags er hann var staddur í sumarbústað sínum við Álftavatn og var fluttur með sjúkrabíl til Reykjavíkur. Hann lá þungt haldinn á gjörgæsludeild þar til í gærkvöldi er hann lést.
Halldór lætur eftir sig eiginkonu, Sigurjónu Sigurðardóttur og þrjár dætur, þær Helgu, Guðrúnu Lind og Írisi Huld, auk barnabarna og barnabarnabarna.
Innleiddi kvótakerfi í sjávarútvegi
Halldór fæddist á Vopnafirði árið 1947. Hann lauk Samvinnuskólaprófi árið 1965 og útskrifaðist sem löggiltur endurskoðandi árið 1970. Þá fór hann í framhaldnám við verslunarháskólana í Björgvin og Kaupmannahöfn á árunum 1971 til 1973. Við heimkomu var hann síðan ráðinn lektor við viðskiptadeild Háskóla Íslands en þeirri stöðu gegndi hann í tvö ár, eða til ársins 1975.
Halldór var fyrst kjörinn á þing árið 1974. Árið 1980 var hann kjörinn varaformaður Framsóknarflokksins og 1983 var hann síðan skipaður sjávarútvegsráðherra. Eitt af hans fyrstu þingmálum sem ráðherra var að innleiða kvótakerfi í sjávarútvegi en frumvarpið var samþykkt árið 1984.
Árið 1994 varð Halldór formaður Framsóknarflokksins og að loknum þingkosningum árið 1995 myndaði flokkurinn ríkisstjórn með Sjálfstæðisflokknum undir forystu Davíðs Oddssonar. Halldór gegndi embætti utanríkisráðherra í stjórninni en samstarf flokkanna entist til ársins 2007. Halldór tók við af Davíð Oddssyni sem forsætisráðherra þann 15. september 2004 og gegndi því embætti í tvö ár.
Sagði af sér í kjölfar slæms gengis flokksins
Halldór lét af þingmennsku og formennsku í Framsóknarflokknum að loknu flokksþingi í ágúst 2006. Það gerði hann í kjölfar slæms gengis Framsóknarflokksins í sveitarstjórnarkosningum en þá hafði hann setið í 31 ár á þing. Halldór gegndi ráðherraembætti nær samfellt í tvo áratugi, rúm 19 ár, og hefur aðeins Bjarni Benediktsson gegnt lengur ráðherraembætti í stjórnmálasögu landsins.
Árið 2007 tók Halldór við sem framkvæmdastjóri Norrænu ráðherranefndarinnar og sinnti hann því embætti til ársins 2013.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir