„Evrópusambandið hefur fellt grímuna og afhjúpað sig sem ólýðræðislega stofnun,“ segir Markos Vogiatzoglou, grískur stjórnmála- og félagsfræðingur sem vinnur við rannsóknir hjá European University Institute, í samtali við Stundina. 

„Þrátt fyrir þær hörmulegu afleiðingar sem harkaleg aðhaldsstefna kallaði yfir íbúa Grikklands undanfarin fimm ár, þá kröfðust fulltrúar Evrópusambandsins þess að slíkri stefnu yrði áfram haldið til streitu. Samt er stefnan ekki aðeins ómannúðleg heldur hefur hún líka brugðist þegar litið er til þeirra markmiða í ríkisfjármálum sem lagt var upp með.“

Sjónarmið Vogiatzoglou eru mjög í anda þeirra sem hafa t.d. birst í skrifum Joseph Stiglitz, nóbelsverðlaunahafa í hagfræði, undanfarna daga. Hann hefur lýst framgöngu þríeykisins – „troikunnar“ sem samanstendur af Alþjóðagjaldeyrissjóðinum, framkvæmdastjórn Evrópusambandsins og Evrópska seðlabankanum – sem „árás á lýðræðið í Grikklandi“.

Bendir hann á að sú efnahagsáætlun sem Grikkir voru látnir undirgangast fyrir fimm árum hefur reynst afar illa, dregið allan þrótt úr hagkerfinu, valdið gríðarlegu atvinnuleysi og 25 prósenta samdrætti vergrar landsframleiðslu. Þrenningin hafi hvorki axlað ábyrgð á mistökunum né lært af þeim, enda sé þess enn krafist að Grikkland skili umtalsverðum afgangi á fjárlögum næstu árin. Þetta myndi óhjákvæmilega dýpka kreppuna í Grikklandi, þar sem atvinnuleysi er nú þegar um 25 prósent.