Deilan um næturklúbbinn Austur fer harðnandi. Ásgeir Kolbeinsson framkvæmdastjóri og fulltrúi eigenda helmings hlutafjár, segir að Kamran Keivanlou, stjórnarformaður 101 Austurstrætis ehf., rekstrarfélags Austurs, hafi hótað sér og fjölskyldu sinni.
Forsaga málsins er sú að Ásgeir hefur gripið til sinna eigin ráða eftir að Kamran og viðskiptafélagi hans létu loka reikningum félagsins vegna deilu við Ásgeir og Styrmi Þór Bragason, eigenda hins helmingsins. Ásgeir hefur fengið annað einkahlutafélag til að taka við greiðslum inni á staðnum, en það heitir Austurstræti 5 ehf. Skemmtistaðurinn Austur er skráður við Austurstræti 7. Þannig hefur hann náð að sneiða hjá aðgerðum stjórnarformanns og eigenda helmings hlutafjár, sem vildi láta loka staðnum, og náð að halda skemmtistaðnum gangandi.
Segir rödd sína sviðsetta
Ásgeir hefur kært Kamran til lögreglu fyrir hótanir, sem hann segist meðal annars eiga á upptöku.
Í samtali við Stundina hafnar Kamran því að hafa hótað Ásgeiri. „Fyrir meira en mánuði síðan var ég boðaður til lögreglunnar ásamt lögmanni mínum vegna staðhæfingar Ásgeirs Kolbeinssonar um að ég væri að hóta honum. Ég hafnaði því hjá lögreglu og útskýrði að það sem hefði verið á upptökunni væri sviðsett rödd. Þetta væri ekki mín rödd. Og ég hótaði honum aldrei,“ fullyrðir Kamran.
Kærði Ásgeir til Sérstaks saksóknara
„Ég kærði hann til Sérstaks saksóknara. Auk þess tilkynntum við til lögreglu að hann væri ólöglega að láta annað fyrirtæki taka við greiðslum og selja áfengi án vínveitingaleyfis. Lögreglan er að rannsaka þetta. Ég treysti lögreglunni og dómstólum til þess að komast að heilbrigðri niðurstöðu. Ég myndi aldrei hóta honum eftir að hafa kært hann til lögreglu. Það var ástæðulaust að hóta honum, við þurftum ekki að gera það vegna þess að við treystum lögreglunni til að klára málið.“
„Hann er að reyna að rugla fjölmiðla, lögregluna, önnur yfirvöld og íslensku þjóðina“
„Hann er að reyna að rugla fjölmiðla, lögregluna, önnur yfirvöld og íslensku þjóðina, vegna þess sem hann er að gera ólöglega á staðnum: Að reka annað fyrirtæki inni á staðnum og selja áfengi án vínveitingaleyfis.“
Bæði leiga á húsnæði Austurs og vínveitingaleyfið er skráð á félagið 101 Austurstræti, en félagið sem Ásgeir fékk til að sjá um að rukka fyrir drykki á staðnum hefur ekki leyfi til að bera. Hins vegar höfðu Ásgeir og Kamran gert samning um að félag Kamrans, Alfacom, myndi kaupa allan rekstur Austurs. Aðeins helmingur hefur verið greiddur og útskýrir Kamran það með því að skilyrði kaupsamnings hafi ekki verið uppfyllt, meðal annars hafi komið fram villandi upplýsingar um reksturinn fyrir sölu.
Segir hótanir beinast að starfsfólki og fjölskyldu
Í samtali við Stundina segist Ásgeir eiga hótanir á upptöku, en Kamran segir röddina á upptökunni vera sviðsetta.
„Hann hefur oft hótað mér og starfsfólki fyrirtækins líka, en þar hefur í raun bara orð staðið á móti orði. Í þetta skipið náði ég að taka þetta upp á símann minn og að sjálfsögðu kærði ég það. Ég ætla ekki að taka því þegjandi að mér og fjölskyldu minni sé hótað. Hvað varðar innihald samtalsins vil ég ekki segja neitt meira um, enda er þetta komið inn á borð lögreglu og er vonandi í hraðri vinnslu þar, enda hefur mér aldrei áður verið hótað svona og finnst það eðlilega ekki góð tilfinning,“ segir Ásgeir.
„Það er starfsfólk sem er á vitnalista lögmanns okkar vegna hótana.“
Aðspurður segist Ásgeir ekki vilja benda á vitni í málinu að svo stöddu, til staðfestingar á hótununum, þar sem hann vilji ekki setja starfsfólk sitt í þá aðstöðu. „Það er starfsfólk sem er á vitnalista lögmanns okkar vegna hótana. Ég auðvitað veit ekki hvort það verði kallað fyrir eða ekki, en ég verð samt að telja það líklegt. En auðvitað snýst þetta mál fyrst og fremst um að staðið verði við þann samning sem gerður var, og því með ólíkindum að því sé ekki leyft að ná til dómstóla án þess að farið sé í hótanir sem þessar. Þetta á auðvitað bara að leysa í réttarsal og punktur. Þannig leysir siðmenntað fólk sinn ágreining.“
Fyrirtaka í skuldamáli Ásgeirs og félaga gegn Kamran og félags hans verður í Héraðsdómi Reykjavíkur á miðvikudaginn, en þar freistar Ásgeir þess að fá Kamran til að borga restina af kaupverði Austurs. Ekki er útilokað að fleiri mál vegna deilunnar fari fyrir dóm, en hún hefur komið inn á borð Sýslumannsins í Reykjavík, Ríkislögreglustjóra, Sérstaks saksóknara, Lögreglunnar á höfuðborgarsvæðinu og innanríkisráðuneytisins.
Athugasemdir