„Ég var í hálfgerðu kvíðakasti í morgun en svo líður mér alveg frábærlega vel,“ segir Erla Hlynsdóttir, fyrrverandi blaðamaður DV, sem í morgun skráði nafn sitt rækilega á blöð sögunnar þegar hún vann þriðja mál sitt fyrir Mannréttindadómstól Evrópu. Það var þáverandi útgáfufélag DV, Birtingur, ásamt Blaðamannafélagi Íslands, sem sótti málið á hendur íslenska ríkinu. Erlu voru dæmdar rúmlega sex milljónir króna í skaðabætur. Hún fékk aftur á móti ekki dæmdan kostnað vegna lögmanna.

Kókaínsmyglarar Forsíðan frá árinu 2007 sem Erla var dæmd fyrir.

Málið snérist um frétt sem Erla skrifaði í DV árið 2007 „Næstum hreint kókaín í pallbíl“ sem fjallaði um ákæru á hendur Rúnari Þór Róbertssyni vegna innflutnings á tæpum 3,8 kílóum af kókaíni. Á forsíðu blaðsins var fullyrt að Rúnar Þór væri „kókaínsmyglari“. Viku eftir að fréttin birtist var Rúnar Þór sýknaður í héraðsdómi og sú niðurstaða var staðfest í Hæstarétti. Rúnar Þór fór fram á gjafsókn íslenska ríkisins. Það var heimilað í ráðherratíð Björns Bjarnasonar og stóð íslenska ríkið undir lögsókninni á hendur blaðamanninum sem nú hefur verið dæmd ólögmæt. Ummælin „kókaínsmyglarar“ og „í þeirri trú að kókaínið væri á sínum stað“ voru dæmd dauð og ómerk í dómi Hæstaréttar árið 2010. Síðari ummælin eru tekin orðrétt upp úr ákæru. Þá var Erlu, ásamt Sigurjóni M. Egilssyni, þáverandi ritstjóra DV, gert að greiða Rúnari Þór 150 þúsund krónur í bætur vegna málsins. Rúnar Þór var síðar dæmdur í tíu ára fangelsi fyrir aðild sína í Papeyjarsmyglinu svokallaða.

Þetta er sem áður segir í þriðja sinn sem Erla sigrar mál gegn íslenska ríkinu fyrir Mannréttindadómstóli Evrópu. Í þeim fyrri var Erla dæmd fyrir ummæli viðmælenda sinna, annars vegar í umfjöllun um kampavínsklúbbinn Strawberry‘s og hins vegar um Byrgismálið. 

Sanngjörn niðurstaða

Erla sagði í morgun að niðurstaðan í málinu væri að sínu mati afar sanngjörn.