Davíð Oddsson, ritstjóri Morgunblaðsins, er enn eitt árið tekjuhæsti fjölmiðlamaður landsins. Samkvæmt Tekjublaði Frjálsrar verslunar sem kom út í morgun voru laun Davíð 3,93 milljónir króna á mánuði í fyrra.

Hluti tekna Davíðs í fyrra, um 1.100 þúsund krónur má rekja til eftirlaunalaga hans sem lögfest voru árið 2003 en voru afnumin sex árum síðar. Lögin tóku til eftirlauna, meðal annars, þingmanna og ráðherra og var sérstaklega áskilið að laun fyrir ritstörf kæmu ekki til frádráttar eftirlaunum.

Eftirlaunalögin voru mjög umdeild þegar þau voru sett enda fólu þau í sér að æðstu ráðamenn fengu langtum hærri eftirlaun en áður þekktist. Mönnum var heimilt að fara á eftirlaun við 55 ára aldur ef þeir höfðu langa starfsreynslu. Þá gátu eftirlaunaþegar þegið launin allt að fjögur ár aftur í tímann, ef þeir kusu að þiggja þau ekki, þegar þeir öðlust rétt til þeirra.

Eftirlaunafrumvarp Davíðs var flutt af meðlimum úr öllum þingflokkum Alþingis árið 2003. Að umræðum loknum voru lögin samþykkt með öllum atkvæðum þingmanna Sjálfstæðisflokksins og Framsóknar, þáverandi stjórnarflokka, auk eins atkvæðis úr röðum Samfylkingarinnar. Aðrir flokkar féllu frá stuðningi við frumvarpið.

Þegar Davíð var spurður, í aðdraganda forsetakosninganna í fyrra, hvort hann hefði sett lögin til að hækka eigin eftirlaun sagði hann svo ekki vera. „Þingið setti lögin og það var sérstök þingmannanefnd sem lagði frumvarpið að lögunum fram. Frumvarpið var borið fram af þingmönnum úr öllum flokkum. Þrír þeirra voru úr stjórnarandstöðunni og tveir úr stjórnarflokkunum þáverandi.“ Davíð minntist hins vegar ekki á að allir þingmenn stjórnarandstöðunnar utan Guðmundar Árna Stefánssonar, þingmanns Samfylkingarinnar, féllu frá stuðningi við frumvarpið.

Þá sagði Davíð lögin hafa gagnast stjórnarandstöðunni mest. „Þeir sem að svo nutu góðs af þessum lögum voru fyrst og fremst formenn stjórnarandstöðuflokkanna sem fengu þegar í stað 50 prósenta hækkun á sín laun en þeir sem nutu eftirlaunanna samkvæmt lögunum voru þeir ráðherrar sem urðu forsætisráðherrar, fyrir utan mig, Geir H. Haarde, Þorsteinn Pálsson, Jóhanna Sigurðardóttir og Halldór heitinn Ásgrímsson,“ sagði Davíð.

Samkvæmt lögunum fær Davíð 80 prósent af launum forsætisráðherra í eftirlaun og er hlutfall hans hærra en annarra forsætisráðherra vegna þess að hann sat lengur í stóli forsætisráðherra. Laun forsætisráðherra voru hækkuð umtalsvert með umdeildum úrskurði Kjararáðs á kjördegi í fyrra, þann 29. október. Þau nema í dag um 1.490 þúsund krónum án þingfararkaups og eru því eftirlaun Davíðs í dag um 1.190 þúsund krónur á mánuði.

Í öðru sæti á lista Frjálsar Verslunar er Haraldur Johannessen, framkvæmdastjóri Árvakurs, útgáfufélags Morgunblaðsins, en laun hans námu 2,6 milljónum króna á mánuði. Í þriðja sæti er Björn Ingi Hrafnsson, útgefandi Pressunnar og DV með 2,4 milljónir króna, en nýverið var tilkynnt að fjárfestar hefðu bakkað frá hlutafjáraukningu í félaginu vegna gríðarlegra vanskila. Kristín Þorsteinsdóttir, ritstjóri 365, kemur þar á eftir með 1,46 milljónir. Fimmti hæst launaði fjölmiðlamaðurinn er Ómar R. Valdimarsson, fréttamaður Bloomberg með rúmar 1,4 milljónir króna.