„Þetta kom mér virkilega á óvart. Mér finnst þetta bara yfirgangur,“ segir ung kona í Eyja- og Miklaholtshreppi, Anna Sesselja Sigurðardóttir, sem hefur verið dæmd í Héraðsdómi Vesturlands til að greiða sekt í ríkissjóð eða sitja ella í fangelsi í fjóra daga, fyrir að halda því fram að oddvitinn í hreppnum hefði fengið traktor að gjöf frá Ólafi Ólafssyni athafnamanni, sem nú situr á Kvíabryggju fyrir hlutdeild í markaðsmisnotkun með hlutabréf í Kaupþingi.

Oddvitinn, sem segist vera „kunningi“ Ólafs Ólafssonar, hefur tekið afstöðu með Ólafi í deilu við Önnu og fjölskyldu hennar, meðal annars þegar þau reyndu að nýta heitt vatn á landareign sinni. Samkvæmt niðurstöðu dómsins fékk Guðbjartur ekki gefins traktor frá Ólafi, eins og Anna hafði sagt, en hann fékk traktor lánaðan.

Dró orð sín til baka en var samt ákærð

Anna Sesselja lét orðin falla á Facebook, en fjölskylda hennar hefur átt í langvarandi deilum við Ólaf Ólafsson og eiginkonu hans, Ingibjörgu Kristjánsdóttur, og hefur Ólafur meðal annars boðist til að kaupa eignina af fjölskyldu Önnu. 

Anna Sesselja gagnrýndi Guðbjart Gunnarsson, oddvita í hreppnum, fyrir tengsl hans við Ólaf í Facebook-færslu. Í ákæru segir að málið hafi verið höfðað fyrir „ærumeiðandi aðdróttanir í garð Guðbjarts Gunnarssonar, oddvita Eyja- og Miklaholtshrepps, með því að hafa sunnudaginn 24. nóvember 2013 á heimili sínu ritað eftirfarandi ummæli á samskiptasíðu (e. Facebook) og frá þeim tíma og fram til mánudagsins 27. sama mánaðar birt þau á internetinu: „[...] En það vantar ekki að hann smjaðrar fyrir Ólafi Ólafssyni sem á Miðhraun 1. Enda gaf Ólafur honum nýjan traktor (mútur eða hvað?) [...]“.

Þrátt fyrir að Anna Sesselja hefði dregið til baka orð sín um að traktorinn hefði verið gjöf og tekið þau af Facebook í kjölfar athugasemdar Guðbjarts oddvita, fór hann fram á að málið yrði rannsakað. „Ég baðst afsökunar. Ég tók þetta út strax um leið og ég fékk athugasemd frá Guðbjarti. En ég tók ekki út heildarfærsluna fyrr en nokkrum dögum seinna,“ segir hún.

Niðurstaðan var að ríkissaksóknari höfðaði mál gegn Önnu fyrir fyrrgreind orð.