Björn Ingi Hrafns­son, útgef­andi og stjórn­ar­for­maður Vef­pressunnar ehf, furð­ast að urgur sé í föngum á Kvía­bryggju vegna heim­sókna Jóns Ásgeirs Jóhann­es­sonar athafna­manns í fang­elsið og gerir málið að umtals­efni í pistli. 

Stundin greindi frá því í morgun að Jón Ásgeir hefði tví­vegis lagt leið sína á Kvía­bryggju og fundað með fyrr­ver­andi stjórn­endum og eig­endum Kaup­þings sem þar afplána. Hlaupið hefði urgur í vist­menn, enda er föngum oft meinað um að fá heim­sóknir manna sem sæta ákæru eða bíða dóms. Jón Ásgeir er á meðal sak­born­inga í svo­nefndu Aurum-máli og upp­lifðu fangar heim­sókn hans sem mis­munun. Var Afstöðu, félagi fanga, gert við­vart og málið borið upp á fundi með fang­els­is­mála­stjóra og for­stöðu­manni Kvía­bryggju.