Niðurstaða mótmæla síðustu daga og afsagnar Sigmundar Davíðs Gunnlaugssonar úr embætti forsætisráðherra er að sama ríkisstjórn heldur áfram með sama málefnasamning þar til kosið verður í haust.
Bjarni Benediktsson, formaður Sjálfstæðisflokksins, var vígreifur í samtali við blaðamenn ásamt Sigurði Inga Jóhannssyni, nýjum forsætisráðherra.
Bjarni var ákveðinn í því að ríkisstjórnin héldi sínu striki.
„Skoðanakannanir sveiflast upp og niður og stjórnarandstaðan er í rusli líka. Eigum við ekki bara að segja það eins og er? Flokkarnir hér á þingi eru fæstir að mælast vel,“ sagði hann.
Þá sagði hann Pírata hafa „skriðið inn á þing“. „Það er einn flokkur sem er tímabundið, hann skreið inn á þing fyrir nokkrum árum síðan og er núna með mikinn stuðning. Hvað annað en nákvæmlega sú staða er til vitnis um að skoðanakönnun dagsins í dag er ekki nema vísbending um það sem gerist næst þegar kosið verður.“
Þá kvaðst Bjarni sjálfur hafa mælst með stuðning. „Ég ætla að sýna fram á það hvað það er sem ég hef fram að færa sem stjórnmálamaður,“ sagði hann.
Samkvæmt nýrri skoðanakönnun MMR bera 60% svarenda lítið traust til Bjarna, en 21,7% mikið traust til hans.
Bjarni gaf lítið fyrir yfirvofandi vantrauststillögu á Alþingi og gaf til kynna að hún yrði afgreidd með einföldum hætti. „Við ætlum að bregðast við henni með því að greiða 38 atkvæði á móti henni.“
Lilja Alfreðsdóttir verður ráðherra, samkvæmt tillögu Sigmundar Davíðs Gunnlaugssonar, formanns Framsóknarflokksins.
Sigmundur heldur áfram sem þingmaður þrátt fyrir að hafa verið staðinn að ósannindum í frásögnum af hagsmunum sínum og hafa láðst að greina frá mikilvægum hagsmunum í skattaskjólinu Tortóla.
Athugasemdir