Þingmenn stjórnarandstöðunnar notuðu liðinn fundarstjórn forseta til þess að kalla á eftir nákvæmri dagsetningu á kjördag í fyrirhuguðum þingkosningum næsta haust. Katrín Jakobsdóttir, formaður Vinstri grænna, sagði meðal annars með öllu óviðunandi fyrir Alþingi Íslendinga að hvorki ekki liggi fyrir dagsetning á kosningunum né hvaða mál verði sett í forgang. 

Sigurður Ingi Jóhannsson átti fund með formönnum stjórnarandstöðunnar í hádeginu. Steingrímur J. Sigfússon, þingmaður Vinstri grænna, sagði nákvæmlega ekkert hafa komið út úr þeim fundi. „Ekki dagsetning kosninga, ekki einu sinni fyrstu drög af forgangsröðun mála,“ sagði hann. Steingrímur sagði einnig tilgangslaust að hefja vinnu í nefndum, því nefndirnar vita ekki í hvaða mál þau eiga að fara. 

Sigríður Ingibjörg Ingadóttir, þingmaður furðaði sig á því að forseti Alþingis láti sér detta í hug að setja á fund við þessar aðstæður. „Krafa almennings er skýr. Hér er búið að mótmæla dögum saman og krefjast kosninga strax,“ sagði hún og bætti því við að ekki væri fundarhæft á Alþingi fyrr en dagsetning kosninga liggur fyrir. 

„Krafa almennings er skýr. Hér er búið að mótmæla dögum saman og krefjast kosninga strax.“

Birgitta Jónsdóttir, þingmaður Pírata, sagði þetta óboðlegt ástand og ekki í boði að ætlast til þess að þingmenn færu í hefðbundin þingstörf og láta eins og ekkert hafi gerst. Hún kallaði sömuleiðis á eftir dagsetningu kosninga. „Hér verða engin hefðbundin þingstörf fyrr en það hefur verið gert,“ sagði hún. 

Jón Gunnarsson, þingmaður Sjálfstæðisflokksins, tók illa í þessi orð Birgittu. „Hér höfum við það,“ sagði hann. „Á meðan þið gerið ekki eins og við viljum þá verða engin hefðbundin þingstörf.“ Jón sagði nákvæmlega það vera að gerast sem stjórnarflokkarnir óttuðust fyrir helgi. 

Róbert Marshall, þingmaður Bjartrar framtíðar, fór næstur í ræðustól. „Í fyllstu einlægni, er til of mikils mælst að biðja um dagsetningu á kosningar? Er það dónaskapur?“ spurði hann meðal annars. Hann sagði kröfu stjórnarandstöðunnar einfalda; að fá dagsetningu á kosningarnar.