Tryggvi Gunnarsson, umboðsmaður Alþingis, segist misboðið fyrir hönd þeirra borgara sem hlut eiga að máli vegna Samherjamálsins svokallaðs en hann kom fyrir stjórnskipunar- og eftirlitsnefnd Alþingis í morgun. Umfjöllunarefni fundarins var lög um gjaldeyrismál og stjórnsýslu Seðlabanka Íslands.
Umboðsmaður sendi Katrínu Jakobsdóttur forsætisráðherra bréf þann 4. mars síðastliðinn sem birtist á vefsíðu hans í dag.
Í bréfi sínu til ráðherra beinir hann sjónum sínum að bréfi Más Guðmundssonar seðlabankastjóra til Katrínar sem hann sendi þann 29. janúar síðastliðinn. Í frétt um bréfið á vefsíðu ráðuneytisins segir að þar sé fjallað um þá lærdóma sem að hans mati beri að draga af reynslunni við framkvæmd gjaldeyriseftirlits á vegum Seðlabanka Íslands í tengslum við áformaða sameiningu seðlabankans og Fjármálaeftirlitsins. Fram kemur að í bréfinu sé varpað ljósi á sum þeirra atriða sem hafi verið í umræðu í framhaldi af áliti hans sem birt var þann 25. janúar síðastliðinn og greinargerð bankaráðs seðlabankans sem birt var 26. febrúar síðastliðinn.
Tryggvi telur að tiltekin ummæli í bréfi seðlabankastjóra og upplýsingar sem honum hafi borist eftir opinbera birtingu bréfsins séu honum tilefni til þess að rita bréfið til Katrínar.
Hann vekur athygli á orðum seðlabankastjóra í bréfi hans til forsætisráðherrans um markmið með framkvæmd fjármagnshaftanna: „Má í því sambandi ekki gleyma því að aðgerðir Seðlabankans höfðu töluverð fælingaráhrif. Þetta mátti t.d. glögglega sjá eftir húsleitina hjá Samherja þó svo ekki hafi verið hugsað út í það fyrirfram, enda ekki lögmætt sjónarmið í þessu samhengi,“ sagði Már í bréfi sínu.
Veltir tilgangi upplýsingagjafar fyrir sér
Tryggvi segist hafa fengið nánari upplýsingar um samskipti starfsmanna Seðlabanka Íslands og Ríkisútvarpsins í aðdraganda húsleitarinnar eftir að greint hafi verið frá bréfi seðlabankastjóra á vef bankans. „Þessar upplýsingar gefa að mínu áliti tilefni til að kallað verði eftir hver var í raun hlutur starfsmanna gjaldeyriseftirlits Seðlabankans í að upplýsa starfsmann Ríkisútvarpsins um hina fyrirhuguðu húsleit. Þá tel ég þörf á að ganga eftir því við Seðlabanka Íslands hver hafi tekið ákvörðun um að veita upplýsingar og hver hafi verið aðkoma og vitneskja yfirstjórnar bankans um þessi samskipti við Ríkisútvarpið,“ segir hann í bréfinu.
Hann veltir því einnig fyrir sér hvort að baki þessari upplýsingagjöf hafi legið sjónarmið af því tagi sem seðlabankastjóri lýsir í bréfi sínu til Katrínar og vitnað var til hér að framan.
Tryggvi segir að orðalag Más veki upp álitamál hvaða tilgangur hafi í raun búið að baki því að upplýsingar um húsleitina og birta og dreifa frétt um hana með þeim hætti sem gert var í þessu máli.
Í bréfinu til Katrínar óskar hann eftir upplýsingum frá ráðuneyti forsætisráðherra um hvort fyrirhugað sé að þau atriði sem fjallað er um í bréfinu komi til athugunar við boðaða athugun ráðuneytisins. „Þetta geri ég m.a. til að geta að fengnu svari ráðuneytisins tekið afstöðu til þess hvernig ég bregst við í tilefni af þeim upplýsingum sem mér hafa verið látnar í té undir þeirri vernd sem 18. gr. laga nr. 85/1997 hljóða um,“ segir hann.
Hann óskar eftir svari við bréfinu sem allra fyrst eða eigi síður en 20. mars næstkomandi.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.















































Athugasemdir