Mustafa Barghouti, læknir og fyrrverandi forsetaframbjóðandi í Palestínu sem fengið hefur tilnefningu til friðarverðlauna Nóbels, hafði samband við meðlimi Hatara í dag og þakkaði þeim fyrir að hafa notað Eurovision-keppnina sem vettvang til að sýna Palestínu stuðning.

„Ég held að þau hafi snert hjörtu allra Palestínumanna með því sem þeir gerðu,“ segir Mustafa í samtali við Stundina. „Ég þakkaði þeim fyrir þrennt. Í fyrsta lagi fyrir að hafa dregið fram palestínska fánann. Eins og þú kannski veist er prinsippafstaða okkar sú að tónlistarfólk eigi að sniðganga Evrópsku söngvakeppina. En við skiljum sjónarmið Hatara um að ef þau hefðu ekki sniðgengið keppnina hefði einfaldlega einhver annar flytjandi tekið þátt fyrir hönd Íslands í staðinn. Þau gerðu það sem þau lofuðu, að draga fram fánann og þessi samstöðuyfirlýsing þeirra hefur vakið athygli um allan heim. Þetta gerðu þau þótt þau vissu að þeim gæti verið refsað fyrir það.“

Mustafa segist einnig hafa þakkað meðlimum Hatara fyrir „dásamlegar yfirlýsingar“ í hinum og þessum fjölmiðlum. Sem kunnugt er hafa hljómsveitarmeðlimir notað hugtök eins og hernám og aðskilnaðarstefna til að lýsa ástandinu fyrir botni Miðjarðarhafs. Þetta hefur vakið talsverða athygli og komið við kauninn á Ísraelsmönnum og stjórnendum söngvakeppninnar.

„Að lokum þakkaði ég þeim fyrir að vera að vinna að nýju lagi fyrir Palestínu,“ segir Mustafa. „Við kunnum mjög að meta það sem þau hafa gert. Allt þetta endurspeglar hve samstaða Íslendinga með Palestínumönnum ristir djúpt.“

„Allt þetta endurspeglar hve 
samstaða Íslendinga með 
Palestínumönnum ristir djúpt“

Eins og fjallað hefur verið um í íslenskum og erlendum fjölmiðlum drógu meðlimir Hatara fram borða með palestínskum fánalitum þegar stigagjöfin var kynnt í gærkvöldi. Olli þetta nokkru fjaðrafoki; öryggisverðir komu aðvífandi og hrifsuðu af þeim fánann og gerð voru hróp að hljómsveitinni. 

Mustafa Barghouti var aðalritari Palestínska þjóðarframtaksins (e. Palestinian National Initiative) um árabil, situr í Löggjafarráði Palestínu og í miðstjórn Palestínsku frelsishreyfingarinnar (PLO).