83% aðspurðra eru hlynntir því að launafólk með heildartekjur undir 500 þúsund krónum á mánuði fyrir skatt fái meiri skattalækkun en aðrir. Þetta kemur fram í nýrri skoðanakönnun sem Gallup gerði fyrir Alþýðusamband Íslands (ASÍ).

Í könnuninni kemur fram að stuðningur við slíka skattalækkun sé mikill í öllum aldurs- og tekjuhópum, en mestur hjá þeim tekjulægstu. Könnunin var netkönnun, gerð dagana 1. til 12. mars. Var úrtakið 1440 manns af öllu landinu og svarhlutfall 57%.

„Þessi niðurstaða rímar vel við þær hugmyndir um skattkerfisbreytingar sem ASÍ kynnti í lok janúar,“ segir í tilkynningu frá ASÍ. „Markmið þeirra tillagna var að létta byrðum af fólki með lágar- og millitekjur, auka jafnrétti og koma á sanngjarnri skattheimtu. Þegar ríkisstjórnin kynnti sínar skattalækkunar hugmyndir nokkrum vikum seinna kom í ljós að sama skattalækkun átti að ganga upp allan tekjustigann, þ.e. það skipti ekki máli hvort einstaklingurinn væri með 300 þús kr. eða 2,3 milljónir í mánaðartekjur, allir fengju það sama.“

Skattbyrði hinna tekjulægstu hefur hækkað mest á undanförnum árum, samkvæmt rannsókn hagdeildar ASÍ frá 2017, og því dregið úr jöfnunarhlutverki skattkerfisins. „Munar þar mestu að skattleysismörk hafa ekki fylgt launaþróun og vaxta- og barnbótakerfin hafa markvisst verið veikt og eru nú í skötulíki miðað við það sem áður var,“ segir í tilkynningu ASÍ.