Ágúst Ólafur Ágústs­son, þing­maður Sam­fylk­ing­ar­innar, hyggst ekki tjá sig frekar um ósæmi­lega hegðun sína gagn­vart konu sem olli því að trún­að­ar­nefnd Sam­fylk­ing­ar­innar áminnti hann. Það hefur hann stað­fest við Stundina. Ágúst kaus sjálfur að víkja af þingi í tvo mán­uði til að vinna í sínum málum, en trún­að­ar­nefndin fór ekki fram á að hann viki.

Ágúst Ólafur greindi frá því á Facebook síðu sinni að kvöldi síð­ast­lið­ins föstu­dags að hann hefði vik­una áður hlotið áminn­ingu frá trún­að­ar­nefnd Sam­fylk­ing­ar­innar vegna óvið­ur­kvæmi­legrar fram­komu við konu í byrjun síð­asta sum­ars. Hann hefði hitt umrædda konu, sem hann kann­að­ist lít­il­lega við, að kvöldi, þau tekið tal saman og í kjöl­far þess farið saman á vinnu­stað hennar.

„Þegar þangað var komið héldum við sam­ræð­unum áfram. Því miður hafði ég mis­skilið illi­lega á hvaða for­sendum við vorum stödd þar og nálg­að­ist ég hana tví­vegis óum­beð­inn og spurði hvort við ættum að kyss­ast. Svar hennar var nei og hún gaf mér skýrt til kynna að það væri ekki í boði með því að banda mér frá sér. Tekið skal fram að það var alger­lega mín ranga ályktun að slíkt væri í boði.

Ég brást við þess­ari skýru höfnun hennar með því að láta mjög sær­andi orð falla um hana. Ég er ekki stoltur af þeim orðum eða fram­komu minni og veg­ferð almennt þetta kvöld. Ég varð mér ein­fald­lega til hábor­innar skammar. Hún bað mig því næst að fara, sem ég og gerði.“

„Ég varð mér ein­fald­lega til hábor­innar skammar“

Ágúst Ólafar segir kon­una síðar hafa haft sam­band við sig og rætt upp­lifun sína af umræddu kvöldi. Sagði hún sam­kvæmt Ágústi að orð hans og æði hefðu sært hana og valdið henni van­líðan. Ágúst bað kon­una afsök­unar og hitti hana síðar á fundi þar sem hún útskýrði fyrir honum hvaða áhrif fram­koma hans hefði haft á sig.

Greinir ekki frá í hverju fagleg aðstoð á að felast

Þá ákvað konan að til­kynna til Sam­fylk­ing­ar­innar hegðun Ágústs Ólafs og var sú hegðun tekin fyrir af trún­að­ar­nefnd flokks­ins. Trún­að­ar­nefnd flokks­ins ákvað að veita Ágústi Ólafi áminn­ingu vegna fram­komu hans. Ekki er um frek­ari við­ur­lög að ræða af hálfu flokks­ins, þannig var það ákvörðun Ágústs Ólafs sjálfs að greina opin­ber­lega frá áminn­ing­unni og að taka sér leyfi frá þing­störfum. Þá ákvað hann einnig að leita sér fag­legrar aðstoðar vegna fram­komu sinnar. Ágúst hefur ekki svarað í hverju sú aðstoð mun fel­ast.

Hvorki for­maður né vara­for­maður Sam­fylk­ing­ar­innar hafa viljað gefa afdrátt­ar­laust út hvort þau sjái fyrir sér að Ágúst Ólafur eigi aft­ur­kvæmt á Alþingi að loknu tveggja mán­aða leyfi sínu. Logi Ein­ars­son sagði í sam­tali við Rík­is­út­varpið að hann teldi mál Ágústs Ólafs grafal­var­legt og að hann þyrfti að axla ábyrgð vegna þess. Það fari eftir ýmsu hvort hann eigi aft­ur­kvæmt á þing, meðal ann­ars hvernig honum gangi að leita sér aðstoðar. Vara­for­mað­ur­inn Heiða Björg Hilm­is­dóttir sagði það eiga eftir að koma í ljós hvort Ágúst Ólafur gæti sest aftur á þing, það færi eftir því hvernig hann ynni úr mál­inu og hvort hann nýtti sér tæki færi til að læra af því. Þá væri for­senda fyrir því að hann og konan næðu sátt.