Björgvin G. Sigurðsson, fyrrverandi viðskiptaráðherra í hrunstjórninni, hefur ákveðið að birta reynslusögu sína á netinu. Björgvin skrifaði bókina Stormurinn – reynslusaga ráðherra eftir hrun og var hún gefin út fyrir átta árum síðan. Fjallar hún um aðdraganda efnahagshrunsins 2008 og eftirmála þess út frá sjónarmiði Björgvins.

Bókin mun vera orðin fágæt á prenti en Björgvin segir engu að síður oft leitað til hans um hana. Því hafi hann ákveðið að birta bókina í heild sinni á netinu, á sérstakri vefsíðu til þess ætlaðri. „Mikilvægt er að allar helst heimildir um þessa einstöku tíma og atburði í sögu okkar séu aðgengilegir í framtíðinni,“ segir Björgvin.

Björgvin sat sem viðskiptaráðherra í ríkisstjórn Geirs H. Haarde á árunum 2007 til 2009. Björgvin axlaði ábyrgð sína á hruninu með því að segja af sér, einn ráðherra, í janúar 2009. „Ég hef aldrei verið í vafa um að ég ber hluta af hinni pólitísku ábyrgð og hef alltaf ætlað að axla hana,“ sagði Björgvin á blaðamannafundi þegar hann tilkynnti afsögn sína. Björgvin gaf kost á sér til áframhaldandi þingsetu og var kjörinn á þing í kosningunum 2009. Hann sat sem formaður þingflokks Samfylkingarinnar á árunum 2009 til 2010. Hann var og einn þeirra ráðherra sem rannsóknarnefnd Alþingis taldi að hefði ekki gripið til viðhlítandi ráðstafana í aðdraganda falls íslensku bankanna. Meirihluti þingmannanefndar Alþingis um skýrslu rannsóknarnefndarinnar komst að þeirri niðurstöðu að draga ætti Björgvin fyrir Landsdóm fyrir aðgerðarleysi sitt. Tillaga þar um var felld á Alþingi.

Hér að neðan má lesa stutta lýsingu úr bók Björgvins, en hana alla má nálgast á síðunni stormurinn.is:

Ríkisstjórnarfundurinn, sem haldinn var morguninn eftir, varð ekki til að draga úr þeim sem vildu ræða stjórnarslit í fullri alvöru.

Nokkrum mínútum eftir að fundurinn hófst var Geir H. Haarde forsætisráðherra kallaður fram. Til baka kom hann fölur yfirlitum og augljóslega mjög sleginn. Einar K. Guðfinnsson sjávarútvegs- og landbúnaðarráðherra sagði okkur síðar að Geir hefði verið ævareiður.

Ástæða þess að Geir var kallaður út af fundinum var að þangað hafði án fyrirvara tilkynnt komu sína óboðinn gestur. Það var Davíð Oddsson seðlabankastjóri. Þegar Geir kom inn á fundinn kvað hann Davíð hafa tjáð sér að hann hefði mjög váleg tíðindi að færa.

Það var rafmagni og spennu hlaðið augnablik þegar Davíð gekk inn í ríkisstjórnarherbergið. Hann var greinilega undir miklu álagi og virkaði lítt hvíldur og tættur útlits. Það var ekki oft sem maður sá gamla stríðshestinum brugðið.