Faxaflóahafnir hafa ekki upplýsingar um hvort herskipin sem hingað til lands eru komin í tilefni af varnaræfingu Atlantshafsbandalagsins beri kjarnavopn eða ekki. Það er þrátt fyrir að öll sveitarfélögin fimm sem standa að sameignarfélaginu hafi lýst því yfir að þau séu kjarnorkuvopnalaus svæði og friðlýst fyrir kjarnorkuvopnum. Hafnarstjóri Faxaflóahafna segir að þar á bæ hafi menn engin úrræði til að meina skipum að koma til hafnar á slíkum forsendum; slíkt sé á hendi utanríkisráðuneytisins. Hjá utanríkisráðuneytinu fást þær upplýsingar að umrædd skip séu ekki búin kjarnavopnum.

Níu herskip koma hingað til lands vegna varnaræfingar Atlantshafsbandalagsins, Trident Juncture 2018. Skipin komu hingað til lands í gær og í dag og munu þau liggja við Sundahöfn og Gömul höfnina fram á sunnudag.

Öll sveitarfélögin sem eiga Faxaflóahafnir, Reykjavíkurborg, Akraneskaupstaður, Hvalfjarðarsveit, Skorradalshreppur og Borgarbyggð, hafa lýst því að þau séu kjarnorkuvopnalaus svæði. Gísli Gíslason, hafnarstjóri Faxaflóahafna, segir í samtali við Stundina að Faxaflóahafnir hafi ekki fengið upplýsingar um hvort umrædd herskip beri kjarnavopn né hafi verið kallað eftir þeim upplýsingum. „Það er utanríkisráðuneytið sem að gengur úr skugga um að þetta séu skip sem ekki stafi einhver sérstakur háski af.“

Spurður hvort Faxaflóahafnir fái sérstaklega upplýsingar frá ráðuneytinu um hvort skipin séu kjarnorkuvopnalaus svarar Gísli: „Ekki sérstaklega. Það á við um þessi skip, sem og önnur skip, að við höfum ekki sérstakar upplýsingar um farm eða annan búnað,“ segir Gísli og segir jafnframt að það sé ekki á valdi Faxaflóahafna að banna skipum að koma í hafnir félagsins nema því aðeins að fá flöggun um það frá öðrum aðilum.

Utanríkisráðuneytið svaraði fyrirspurn Stundarinnar um það hvort herskipin bæru kjarnavopn með eftirfarandi hætti: „Engin kjarnavopn eru um borð í þeim skipum sem hafa viðkomu á Íslandi vegna þátttöku í varnaræfingunni Trident Juncture 2018. Fyrir liggur samkvæmt þjóðaröryggisstefnu fyrir Ísland, sem samþykkt var á Alþingi árið 2016, að Ísland og íslensk landhelgi eru friðlýst fyrir kjarnavopnum að teknu tilliti til alþjóðlegra skuldbindinga. Þátttökuríki í Trident Juncture eru mjög meðvituð um þá stefnu stjórnvalda og virða hana, auk þess sem þættir varnaræfingarinnar hér við land kalla á engan hátt á viðveru slíkra vopna.“