Rekstur samstæðu Reykjavíkurborgar á fyrri hluta ársins var 115 milljónum króna lakari en gert hafði verið ráð fyrir. Í heild var rekstrarniðurstaðan jákvæð um rúma 9 milljarða króna. Hreinar vaxtaberandi skuldir borgarinnar lækkuðu hins vegar, bæði í krónum talið og sem hlutfall af rekstrartekjum. Þetta kemur fram í árshlutareikningi sem borgarráð afgreiddi í dag.

Rekstur A-hluta var hins vegar tæpum 2 milljörðum betri en búist var við. Betri rekstrarniðurstöðu A-hluta má helst rekja til sölu á byggingarétti, sem var 2,1 milljörðum krónum umfram áætlun. Verri niðurstöðu samsteypunnar má hins vegar rekja til minni hækkunar fjárfestingaeigna Félagsbústaða og hærri fjármagnsgjalda vegna raforkusamninga hjá Orkuveitu Reykjavíkur. Rekstrarniðurstaða fyrir fjármagnsliði var 2,9 milljörðum betri en áætlun gerði ráð fyrir.

„Fjármagnsgjöld voru 1,9 makr hærri en áætlun gerði ráð fyrir en þar vegur þungt 4 makr gjaldfærsla gangvirðisbreytinga innbyggðra afleiða í raforkusölusamningum (álafleiðan),“ segir í skýrslu með árshlutareikningnum. „Fasteignaverð á tímabilinu hækkaði minna en gert var ráð fyrir sem leiddi til að matsbreyting eigna Félagsbústaða var tæpum 1,3 makr undir áætlun.“

Hreinar vaxtaberandi skuldir borgarinnar lækkuðu um 3 milljarða króna á tímabilinu og eru nú 105% sem hlutfall af rekstrartekjum.