Líf Magneudóttir, borgarfulltrúi Vinstri grænna, rak út úr sér tunguna framan í Mörtu Guðjónsdóttur, borgarfulltrúa Sjálfstæðisflokksins, á fundi borgarráðs í dag eftir að Marta hafði starað á hana.
Líf bað Mörtu afsökunar í fundarhléi, en Marta segist líta svo á að það hafi hún aðeins gert til að reyna að koma í veg fyrir að Marta myndi bóka um hegðunina. „Hún bað mig afsökunar í fundarhléi, þegar hún var orðin þess áskynja að ég ætlaði að bóka um málið. Ég lít svo á að með því hafi hún verið að reyna að koma í veg fyrr að ég leggði fram bókunina. Hafi hún meint eitthvað með því að hún vildi biðja mig afsökunar, þá hefði hún átt að bóka þá afsökun eða birta á opinberum vettvangi. Henni var það í lófa lagið þar sem ég lét hana vita að ég hyggðist bóka um málið, og sendi henni bókunina á fundinum sjálfum,” segir Marta í samtali við Stundina.
Marta, aðrir fulltrúar Sjálfstæðisflokksins i borgarráði og Vigdís Hauksdóttir, áheyrnarfulltrúi Miðflokksins, lögðu síðan fram bókun þar sem alvarlegar athugasemdir voru gerðar við framkomu Lífar. „Ég krefst þess að Líf Magneudóttir sýni sóma sinn í að biðja mig afsökunar afsökunar, á opinberum vettvangi, fyrir þennan dónaskap,” segir Marta í samtali við Stundina.
Í fundargerð borgarráðs frá því í dag kemur fram að þær Marta og Vigdís hafi lagt fram svohljóðandi bókun:
Alvarlegar athugasemdir eru gerðar við framkomu tiltekins borgarráðsfulltrúa meirihlutans, fulltrúa Vinsti grænna, í upphafi fundar. Það er ekki sæmandi að borgarfulltrúar leyfi sér þá óháttvísi og dónaskap að ulla framan í aðra fulltrúa. Gera verður þá kröfu til kjörinna fulltrúa að þeir setji fram mál sitt með málefnalegum hætti og sýni hverjir öðrum almenna kurteisi. Ljóst er að full þörf er á þeim samskiptareglum sem fulltrúi Flokks Fólksins hefur lagt fram en þar kemur einmitt fram að kjörnir fulltrúar leyfi sér ekki dónaskap á borð við grettur og geiflur eins og gert var í því tilfelli sem fram kemur hér að ofan.
Í samtali við Stundina segist Marta furðu lostin yfir hegðun Lífar. „Líf sýndi mér bara dónaskap og virðingarleysi þegar hún rak framan í mig tunguna vegna málflutnings míns, sem ég get ekki haft eftir þar sem trúnaður ríkir um fundi borgarráðs. Mér finnst þetta ekki sæmandi kjörnum fulltrúa, eða fullorðinni manneskju ef út í það er farið. Það hlýtur að vera hægt að gera þá kröfu á kjörna fulltrúa að þeir kunni að haga sér.“
Marta segir enn fremur að hún furði sig á þessari framkomu Lífar, ekki síst í ljósi þess að talsverð umræða hafi verið um samskiptamál innan borgarstjórnar upp á síðkastið. Þannig hafi Kolbrún Baldursdóttir, borgarfulltrúi Flokks fólksins, lagt til að settar yrðu samskiptareglur í borgarstjórn. „Þessi framkoma Lífar ýtir bara undir að það verði gert, það er greinilega full þörf á,” segir Marta.
Uppfært kl. 21:00
Líf Magneudóttir tjáir sig um málið á Facebook. Hún skrifar:
„Hvað gerir maður þegar einhver starir á mann í lengri tíma af miklu yfirlæti og vanþóknun í þrúgandi og kúgandi aðstæðum eftir að maður hefur verið málefnalegur og sanngjarn í sínum málflutningi en fær ómálefnaleg viðbrögð á móti? Jú - maður reynir að slá þessu öllu upp í grín og létta andrúmsloftið og losa sig úr störukeppninni með því að ulla bara á viðkomandi, lyfta brúnum og brosa.
Það er nú fokið í flest skjól ef það má ekki sýna nein svipbrigði og vera geðríkur, segja lélega eða góða brandara eða gera tilraunir til að létta á súrum samskiptum fólks með léttleika. Ó jæja.
Þetta mál er löngu búið af minni hálfu og því lauk strax í morgun þegar ég bað Mörtu afsökunar kunni ég að hafa sært hana með þessu glensi. Nóg um það.“
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir