Sigmundur Davíð Gunnlaugsson, formaður Miðflokksins, lagði fram fyrirspurn til forseta Alþingis í dag þar sem hann spyr „hver veitti leyfi fyrir því að hálfnakið fólk nýtti Alþingishúsið í auglýsingaskyni og gengi þaðan á sama hátt og forseti Íslands og þingmenn gera við þingsetningu“.

Þar vísar hann til ljósmyndasýningarinnar Demoncrazy á Listahátíð Reykjavíkur þar sem sjá má ungar berbrjósta konur standa ákveðnar og einbeittar við styttur, ljósmyndir og málverk af valdamiklum körlum í opinberum rýmum. 

Í umfjöllun um verkið á vef Listahátíðar segir meðal annars: „Þær horfa beint í myndavélina og ögra þeirri jakkafataklæddu, miðaldra og karlkyns ímynd valdsins sem þær hafa alist upp við. Þær eru komnar til að vera. DEMONCRAZY er röð ljósmynda í yfirstærð sem sýndar eru á Austurvelli.“

Sigmundur leggur eftirfarandi spurningar fyrir Steingrím J. Sigfússon þingforseta:

1. Hver veitti leyfi fyrir því að hálfnakið fólk nýtti Alþingishúsið í auglýsingaskyni og gengi þaðan á sama hátt og forseti Íslands og þingmenn gera við þingsetningu? 

2. Telur forseti Alþingis slíka notkun á þinghúsinu og þinghefðum til þess fallna að auka virðingu Alþingis? 

3. Var þetta leyfi tengt stuðningi forseta Alþingis við málstað þeirra sem leyfið hlutu? 

4. Mega aðrir hópar vænta þess að fá leyfi fyrir sams konar viðburðum óháð því hvort forseti Alþingis er fylgjandi málstað þeirra eða ekki? 

5. Er þetta leyfi til marks um að vænta megi frekari tilslakana á reglum um klæðaburð Alþingismanna?“