Ný myndbandaröð Knattspyrnusambands Íslands sem sýnir liðsmenn knattspyrnulandsliðs Íslands sem ofurhetjur er gagnrýnt fyrir að minna um of á áróðursmyndir nasista.
Í teikningunum af landsliðsmönnunum eru þeir útmálaðir sem harðfylgin og árásarhneigð vöðvatröll og þeir tengdir við tákn víkinga. Þess ber að geta að víkingar fóru reglulega til Rússlands í svokallaðan austur-víking, en þar var aðallega um verslunarferðir að ræða, fremur en dráps- og ránsferðir eins og þegar farið var í vesturvíking til Bretlandseyja.
Myndböndin virðast ætluð til dreifingar erlendis, þar sem nýjasta myndbandinu er deilt með orðunum „We are ready for Russia. What about you?“
Tónlistargagnrýnandinn Arnar Eggert Thoroddssen segir myndbandaröðina „ömurlega“, „hallærislega“ og „korter í „white power“-ímyndir.“
„Mikið er þetta hallærislegt. Íslenska liðið hefur fyrst og fremst notið vinsælda vegna drengskapar og gleði; heilnæms viðhorfs til íþróttarinnar og stuðs. Hér eru þeir orðnir ómanneskjulegir, blóðþyrstir barbarar. Vígamenn og nokkurs konar arískur undirtónn í þessu. Korter í "white power" ímyndir. Ömurlegt, klisjukennt víkingablæti. Og þetta á vegum KSÍ!? Hörmung!!!“ segir Arnar Eggert.
„Hér eru þeir orðnir ómanneskjulegir, blóðþyrstir barbarar.“
Leikarinn og grínistinn Þorsteinn Guðmundsson veltir því upp á Facebook í dag hvort aðrar áherslur hefðu komið til greina. „Hefði viljað vera á þessum hugmyndafundi: „Hvaða ímynd viljum við sýna? Kannski leggja áherslu á að alþingi á Þingvöllum er eitt það elsta á Norðurlöndum og þó svo víðar væri leitað? Að við áttum fyrsta kvenkyns forsetann og stöndum í fremstu röð í jafnréttismálum? Að við erum vel menntuð þjóð og eigum fullt af góðum vísindamönnum og listamönnum á öllum sviðum? Nei, sýnum þá ímynd að við séum eins og ný-nasistar á sterum með ranghugmyndir um víkingamenningu“.“
Myndböndin vekja hins vegar góð viðbrögð hjá erlendum stuðningsmönnum íslenska landsliðsins. „Ég er mexíkóskur og ég hef stutt Ísland frá árinu 2014; og ég mun styðja ykkur í staðinn fyrir landsliðið mitt. Gangi ykkur vel!“ segir knattspyrnuáhugamaður frá Mexíkó.
Þá segist Brasilíumaður einnig styðja íslenska liðið umfram sitt. „Ég er brasilískur, en ég kýs að styðja við íslenska liðið frekar en það brasilíska. Ísland er eitt af uppáhaldsliðum mínum í heimsmeistarakeppninni 2018. Mig dreymir um að heimsækja Ísland, og höfuðborgina Reykjavík,“ segir hann.
Athugasemdir