Umræða um að snið­ganga Eurovision söngvakeppn­ina sem haldin verður í Ísrael á næsta ári er hafin í Írlandi. Meðal þeirra sem hafa kallað eftir að að Írar snið­gangi keppn­ina er söngv­ar­inn Charlie McGettigan, sem vann keppn­ina árið 1994 þegar hann flutti lagið Rock ‘n‘ Roll Kids. Meðal ann­arra sem hafa kallað eftir því að keppnin verði snið­gengin er borg­ar­stjóri Dyflinar, höf­uð­borgar Írlands.

Þúsundir hvetja til sniðgöngu Íslands

Áköf umræða hófst á Íslandi, eftir sigur Ísraels í söngvakeppn­inni síð­ast­liðið laug­ar­dags­kvöld, um að snið­ganga ætti keppn­ina að ári vegna mann­rétt­inda­brota Ísra­els­stjórnar á Palest­ínu­mönnum. Fram­ferði ísrelska hers­ins á Gaza-strönd­inni síð­ustu daga, þar sem tugir almennra Palest­ínu­manna hafa verið drepnir í mót­mæla­að­gerðum gegn her­námi Ísraela, hefur hellt enn frek­ari olíu á eld­inn. Ríflega 17 þús­und manns hafa skrifað undir áskorun þar sem hvatt er til þess að Ísland snið­gangi keppn­ina að ári. Meðal þeirra sem hafa lýst sig fylgj­andi því eru Páll Óskar Hjálmtýs­son, sem keppti fyrir Íslands hönd í Eurovision árið 1997, og Daði Freyr Pét­urs­son, sem lenti í öðru sæti í und­ankeppn­inni hér á Íslandi á síð­asta ári.

Stjórnmálamenn vilja að Írar sniðgangi keppnina í Ísrael

Borg­ar­stjóri Dyflinar, Micheal Mac Donncha, lýsti því strax á sunnu­dag, dag­inn eftir úrslit keppn­innar, að hann væri þeirrar skoð­unar að Írland ætti að snið­ganga keppn­ina í Ísrael að ári. Donncha lýsti því yfir í írskum fjöl­miðlum að Írar ættu að sýna sam­stöðu með Palest­ínu­mönnum og neita þátt­töku. „Það þarf að varpa ljósi á hin hræði­legu hryðju­verk sem framin eru gegn palest­ínsku þjóð­inni. Það þarf að ná fram sam­stöðu rétt eins og náð­ist fram varð­andi íbúa Suður-Afríku undir aðskiln­að­ar­stefn­unni,“ sagði Donncha. Tveir írskir þing­menn á Evr­ópu­þing­inu hafa sömu­leiðis lýst því yfir að snið­ganga beri keppn­ina í Ísrael á næsta ári.

Sigurvegarinn frá 1994 vill að Írar sitji heima

Söngv­ar­inn Charlie McGettigan lýsti þeirri skoðun að skipu­leggj­endur Eurovision ættu að hafna því að keppnin færi fram í Jer­úsalem að ári og færa hana annað. „Evrópa hefur þarna tök á að senda frá sér yfir­lýs­ingu og segja, „Heyrið þið, við sam­þykkjum ekki að það sé í lagi að fagna á meðan fólk deyr. Það er eins og Neró gerði í Róm, hann spil­aði á fiðl­una á meðan borgin brann. Það ætti að leggja áherslu á það við keppn­is­hald­ara að snið­ganga Ísrael og halda keppn­ina í ein­hverju öðru landi. Ef það ger­ist ekki eigum við að sitja heima.“  Írland er sig­ur­sæl­asti þátt­tak­andi í Eurovision söngvakeppn­inni en Írar hafa unnið hana í sjö­gang, síð­ast 1996.

Að minnsta kosti 60 Palest­ínu­menn voru drepnir af leyniskyttum ísra­elska hers­ins í mót­mælum á Gazaströndinni á mánu­dag. Þúsundir eru sárir. Mótmælin eru bæði vegna til­færslu og opn­unar sendi­ráðs Banda­ríkj­anna í Jer­úsalem en einnig vegna þess að 70 ár eru frá því að Ísra­els­ríki var stofnað, sam­hliða því að yfir 700 þús­und Palest­ínu­menn voru hraktir frá heim­ilum sínum í þjóð­ern­is­hreins­unum Ísra­els­manna.