Eldsneyti á flugvélar í millilandaflugi er 15,2 prósentum dýrara á Egilstöðum, og 7,7 prósentum dýrara á Akureyri, en í Keflavík. Á sama tíma er venjulegt eldsneytisverð, á bifreiðar og vinnuvélar og til innanlandsflugs, því sem næst hið sama um allt land. Ástæða þess er sú að starfræktur er flutningsjöfnunarsjóður olíuvara, sem nýttur er til að jafna verð á eldsneyti til notkunar innanlands. Anna Kolbrún Árnadóttir, þingkona Miðflokksins, segir að þessi staða standi uppbyggingu millalandsflugs til Akureyrar og Egilsstaða fyrir þrifum og hefur lagt fram þingsályktunartillögu þess efnis lækka skuli eldsneytisverð í millilandaflugi.
Þingsályktunartillaga Önnu Kolbrúnar, sem jafnframt er flutt af öllum þingmönnum Miðflokksins, gerir ráð fyrir að samgöngu- og sveitarstjórnarráðherra undirbúi í samráði við fjármála- og efnahagsráðherra lagafrumvarp þar sem gerðar verði ráðstafanir til að lækka eldsneytisverð til millilandaflugs. Með slíkri lækkun styrktist staða ferðaþjónustu á landsbyggðinni og ýtt yrði undir dreifingu ferðamanna um landið, að mati flutningsmanna.
„Það er 350 þúsund krónum dýrara að tanka á Egilstöðum heldur en í Keflavík“
Samkvæmt ársgömlum upplýsingum frá Isavia, sem Markaðsstofa Norðurlands aflaði, er 7,7 prósenta verðmunur á þotueldsneyti á milli Keflavíkurflugvallar og Akureyrarflugvallar. Þá er 15,2 prósentum dýrara að kaupa eldsneytið á Egilsstöðum heldur en í Keflavík.
Skekkir samkeppnisstöðu
Anna Kolbrún segir í samtali við Stundina að þetta þýði auðvitað að samkeppnisstaða landsbyggðarflugvallanna sé skökk í samanburði við Keflavíkurflugvöll. „Ef við ímyndum okkur venjulega farþegaþotu, sem tekur þetta í kringum 200 farþega, þá kostar það 175 þúsund krónum meira að taka eldsneyti á Akureyri heldur en í Keflavík. Við erum síðan að tala um að það er 350 þúsund krónum dýrara að tanka á Egilstöðum heldur en í Keflavík.
Í þessu samhengi ætti fólk að velta fyrir sér af hverju flugvélar bresku ferðaskrifstofunnar Super Break, sem eru að fljúga til Akureyrar í tilraun til að markaðssetja sig á þeim áfangastað, af hverju þær hafa valið oftar en einu sinni að snúa vélum til Keflavíkur frekar en til Egilsstaða þegar ekki hefur verið hægt að lenda á Akureyri. Raunar er það svo samkvæmt mínum upplýsingum að sannarlega er eitt tilfelli þar sem alveg er ljóst að vél frá þeim gat ekki lent á Akureyri vegna aðstæðna þar en mér er líka sagt að það sé í einhverjum tilfellum málum blandið að ekki hafi verið hægt að lenda fyrir norðan þegar ákveðið var að lenda í Keflavík.“
Sex sinnum lent í Keflavík í fimmtán ferðum
Hjalti Páll Þórarinsson hjá Markaðsstofu Norðurlands segir í samtali við Stundina að af 15 ferðum Super Break til Akureyrar hafi endað með því að í sex skipti hafi verið lent í Keflavík. „Það er í raun miklu hærra hlutfall heldur en við heimamenn teljum að hafi þurft að vera. Það gerðist að minnsta kosti tvisvar að það var ákveðið kvöldið áður að flogið yrði til Keflavíkur, vegna slæmrar veðurspár að sögn. Sérstaklega þótti okkur það gremjulegt í annað skiptið því um hádegi daginn sem vélin átti að lenda var vindur fjórir hnútar og sólskin. Við erum ekki alveg sammála því að ekki hafi verið hægt að lenda þá. Super Break samdi við pólskt flugfélag sem heitir Enterer og það er í raun ekki við ferðaskrifstofuna að sakast, það er flugfélagið sem hefur síðasta orðið í þessum efnum. Ég ætla ekkert að segja um ástæðurnar fyrir þessu en svona var þetta.“
Anna Kolbrún bendir jafnframt á að Flugþróunarsjóður, sem settur var á laggirnar í október 2015, eigi samkvæmt samþykktum bara að starfa til ársins 2019. Þó er gert ráð fyrir því í fjármálaáætlun 2019-2023 að sjóðurinn muni starfa lengur en svo, en í eitthvað smærra sniði. Raunar er það svo að hagsmunaaðilar hafa lýst því að sá sjóður hafi alls ekki náð að sinna sínu hlutverki eins og til var ætlast, en markmiðið með honum var að styðja við uppbyggingu nýrra flugleiða svo koma mætti á reglulegu millilandaflugi til Akureyrar og Egilsstaða. Hins vegar hafi komið í ljós að stuðningur sjóðsins samræmist ekki reglum ESA, Eftirlitsstofnunar EFTA, og því hafi ekki verið hægt að úthluta úr honum fjármunum eins og vonast var til. Því sé enn mikilvægara en ella að styrkja stöðu flugvallanna á landsbyggðinni, meðal annars með jöfnun eldsneytisverðs.
Athugasemdir