Ekkert bendir til þess að gögn í máli Roberts Downey hafi týnst eða að þeim hafi verið eytt á skjön við verkferla. Þetta kom fram á opnum fundi í allsherjar- og menntamálanefndar um varðveislu sönnunargagna í sakamálum í dag, en þetta stangast á við það sem Önnu Katrínu Snorradóttur hafði verið greint frá af lögreglunni á höfuðborgarsvæðinu. Sigríður J. Friðjónsdóttir ríkissaksóknari sagði að um ákveðinn misskilning væri að ræða. 

Fulltrúi Pírata í nefndinni, Þórhildur Sunna Ævarsdóttir, óskaði eftir því að nefndin héldi opinn fund en tilefni fundarins er fréttaflutningur af málum er varða varðveislu sönnunargagna, meðal annars frétt þess efnis að öllum sönnunargöngum í máli Roberts Downey, þá Róberts Árna Hreiðarssonar, hafi verið eytt. Einnig var til umræðu hvarf verðmæta úr húsleitum tengdum kampavínsklúbbnum Strawberries og Fréttablaðið greindi frá í síðustu viku. Gestir fundarins voru Sigríður Björk Guðjónsdóttir, lögreglustjóri á höfuðborgarsvæðinu, Sigríður Á. Andersen dómsmálaráðherra, Sigríður J. Friðjónsdóttir ríkissaksóknari og Haraldur Johannessen ríkislögreglustjóri.

Misskilningur varðandi varðveislu gagnanna

Stundin greindi frá því þann 14. desember síðastliðinn að lögreglan á höfuðborgarsvæðinu hefði tilkynnt Önnu Katrínar Snorradóttur, sem kærði Robert fyrir kynferðisbrot í sumar, að lögreglan á Suðurnesjum hefði eytt öllum gögnum í málinu. Þegar hún lagði fram kæru í sumar treysti hún því að lögregla ætti enn afrit af myndum og tölvusamskiptum sem gerð voru upptæk við húsleit á heimili Roberts árið 2005, en hún taldi víst að þar væri að finna gögn sem styddu frásögn hennar. 

Við húsleit heima hjá Roberti fundust meðal annars tveir farsímar, fjögur símkort og minnisbók sem innihélt 335 kvenmannsnöfn með ýmist eða bæði símanúmerum eða netföngum. Athygli vakti að við umrædd kvenmannsnöfn mátti víða sjá skráðar tölur sem lögregla taldi vísa á aldur stúlknanna. Í tölvum Roberts fannst að auki töluvert magn af barnaklámi, alls 225 ljósmyndir sem lögregla flokkar sem barnaklám. Á heimili hans fundust einnig fimm myndbandsspólur sem sýna börn á kynferðislegan og klámfenginn hátt.  

Þann 13. desember fékk hún hins vegar símtal frá Árna Þór Sigmundssyni yfirmanni hjá kynferðisbrotadeild lögreglunnar á höfuðborgarsvæðinu þar sem henni var tilkynnt að gögnunum hafi verið eytt. Eyðing gagnanna mun hafa verið bókfærð hjá Lögreglunni á Suðurnesjunum 24. febrúar 2015. Ólafur Helgi Kjartansson, lögreglustjóri á Suðurnesjum, þvertók hins vegar fyrir að gögnum hafi verið eytt í máli Roberts Downey hjá embættinu og sagði gögn í málinu hafi verið send til Reykjavíkur á sínum tíma.

Í máli Sigríðar J. Friðjónsdóttur ríkissaksóknara kom fram að um ákveðinn misskilning væri að ræða í málinu. Í sakamálinu gegn Róberti Árna Hreiðarssyni, eins og hann hét þá, hefðu sönnunargögnin fylgt málinu til dómsins á sínum tíma. Minnisbókin fylgdi málinu með gögnum málsins til Hæstaréttar og sömuleiðis sé til afrit af henni hjá Ríkissaksóknara. Hins vegar hafnaði dómurinn upptöku á tölvum sem voru haldlagðar í málinu og þeim bar því að eyða, hafi ekki verið gert tilkall til þeirra af hálfu eiganda, það er Róberti Árna. „Í sjálfu sér var ekkert þarna sem hafði misfarist,“ sagði Sigríður. 

Verklagsreglur brotnar

Varðandi Strawberries-málið svokallaða sagði Sigríður að eitthvað hafi augljóslega farið úrskeiðis í verklaginu þar, en svo virðist sem verðmæti sem haldlögð voru árið 2013 við húsleit sem tengdist kampavínsklúbbnum Strawberries hafi horfið úr vörslu lögreglu. Um var að ræða ýmsa skartgripi, hringi, Rolex-úr, hálskeðjur og bindisnælur sem fundust í svörtu veski í peningaskáp inni í bílskúr. Munirnir voru allir skráðir í munaskrá lögreglu en svo virðist sem þeir hafi aldrei skilað sér í munavörsluna sjálfa.

Héraðssaksóknari hefur hætt rannsókn í málinu og hefur kærandinn mánuð til að kæra þá ákvörðun. Málið getur því enn komið á borð ríkissaksóknara og gat Sigríður því ekki tjáð sig nánar um það. 

Sigríður Björk Guðjónsdóttir, lögreglustjórinn á höfuðborgarsvæðinu, sagði málið litið mjög alvarlegum augum innan embættisins. „Munirnir hafa ekki komið í leitirnar þrátt fyrir ítarlega leit. Þetta hefur verið skoðað innan embættisins með eins nákvæmum hætti og mögulegt er. Það var settur starfsmaður í það þegar þetta kemur upp og við þá skoðun, sem fólst meðal annars í samtölum við þá sem koma að húsleitinni og haldlagningu munanna á sínum tíma, þarna 2013. Þá kemur í ljós að það hefur ekki verið fylgt verklagsreglum vegna þess að hlutirnir skila sér ekki inn í munavörsluna. Til stendur að endurskoða verkferla til að koma í veg fyrir að þetta geti komið fyrir aftur.