Þúsund kossar er að mörgu leyti ein­stök bók. Þar ber fyrst að telja að þar skrifar Jón Gnarr sögu Jógu, konu sinnar. Það út af fyrir sig hlýtur að hafa verið snúið verk­efni fyrir svo nákomið fólk að skrifa saman bók um svo per­sónu­lega reynslu sem raun ber vitni. En þetta heppn­að­ist vel og úr verður sterk saga sem lýsir konu sem fer ótroðnar slóðir í líf­inu og hrekst inn í aðstæður sem eru lík­ari mögn­uðum og úthugs­uðum sögu­þræði í glæpa­sögu en raun­veru­legri upp­lifun ungrar konu sem í sak­leysi sínu treystir fólki.

Alvarlegt bílslys

Jóga hefur lítið sem ekk­ert gert af því að koma fram opin­ber­lega; hálf­gerð huldu­kona. Í borg­ar­stjóra­tíð Jóns, manns hennar, var hún sveipuð dulúð. Hún virt­ist ekk­ert kæra sig um athygl­ina sem fylgdi því að vera maki borg­ar­stjóra. En nú kveður við nýjan tón. Jón taldi hana inn á það að segja sögu sína og þá sér­stak­lega af alvar­legu bílslysi sem Jóga lenti í í Banda­ríkj­unum og eft­ir­málum þess. Jóga stórslas­að­ist og þurfti að berj­ast fyrir bótum alla leið upp í Hæsta­rétt Banda­ríkj­anna.

Þúsund kossar lýsir barn­æsku Jógu í Kópavogi. Hún fór gjarnan í heim­sóknir á Kópa­vogs­hælið til að heim­sækja vist­kon­urnar í því skyni að gleðja þær. Þessi hluti bók­ar­innar lýsir mik­illi mann­gæsku sögu­per­són­unnar sem finnur upp á alls konar skemmti­leg­heitum til að gleðja kon­urnar sem dvöldu á heim­il­inu við dap­ur­legar aðstæður. Hún kenndi þeim að dansa og söng fyrir þær og spil­aði á píanó. Svo datt henni í hug að koma upp bóka­safni fyrir þær. Hún sótti bunka af bókum á bóka­safnið í Kárs­nes­skóla og kom þeim hag­an­lega fyrir í hillu á Kópa­vogs­hæli. Vist­kon­urnar urðu him­in­lif­andi.

Þarna er lýst algjör­lega ein­stakri atburða­rás. 

Ein kvenn­anna hafði ein­lægan áhuga á brúð­kaupum og safn­aði úrklippum tengdum þannig við­burðum í möppu. Önnur átti kærasta, Jóa á hjól­inu, og þráði ekk­ert heitar en að gift­ast honum, sem var óhugs­andi. Jóga fann til með kon­unni og fann leið til að gleðja hana. Kærast­inn var kall­aður til og Jóga gaf þau saman með pomp og prakt sem end­aði með stóru amen. Svo settu þau upp gard­ínu­hringa og brúð­gum­inn hjólaði sína leið; einn.

Einstök bókSterk saga konu sem fer ótroðnar slóðir í líf­inu og hrekst inn í aðstæður sem líkj­ast sögu­þræði glæpa­sögu.

11 milljónir í bætur

Merki­leg­asti hluti bók­ar­innar fjallar um dóms­málið í Banda­ríkj­unum sem stóð um ára­bil. Jóga vann málið að lokum, Henni voru dæmdar 110 þús­und doll­arar í bætur, eða rúm­lega 11 millj­ónir íslenskra króna. En þá hófst atburða­rás sem reynd­ist henni dýr­keypt. Jóga dregur ekk­ert undan í þeirri frá­sögn sinni. Les­and­inn verður gjör­sam­lega agn­dofa. Þarna er lýst algjör­lega ein­stakri atburða­rás. Í eft­ir­mála bók­ar­innar rifjar Jóga upp atburð­inn og reynir að varpa ljósi á ástæður þess að svona fór.

Huldukonan Jóga

Þúsund kossar er hlý og góð bók. Huldu­konan Jóga gefur fólki fágæta inn­sýn í líf sitt. Það er ekki ein­falt að opna mál eins og það sem kemur fram í lok bók­ar­innar. Þessu máli fylgir skömm, þótt Jóga sé þol­and­inn. Það þarf svo sann­ar­lega kjark til að lýsa því sem gerð­ist í lífi hennar eftir að Hæsti­réttur hafði dæmt henni í hag. Einstök frá­sögn og opin­ská. 

Þúsund þakkir, Jóga og Jón, fyrir sterka sögu.

Þúsund þakkir, Jóga og Jón, fyrir sterka sögu. Hún er ein þeirra bestu sinnar gerðar í jóla­bóka­flóð­inu. Það verður eng­inn svik­inn af því að lesa sér til ánægju og betr­unar um Jógu sem varpar af sér hul­iðs­hjúpnum með eft­ir­minni­legum hætti. 

Kápa bók­ar­innar er í senn sér­stök, lát­laus og fal­leg. Tit­ill­inn hittir beint í mark. Bókin er öllum aðstand­endum til sóma.