Þrír friðargæsluliðar Sameinuðu þjóðanna særðust þegar herstöð þeirra í suðurhluta Líbanon varð fyrir árás í gær, að sögn friðargæslusveitar SÞ og hersins í Gana, en forseti Líbanon sakar Ísrael um að hafa beint árásinni að þeim.

Árásin var gerð á sama tíma og Ísrael og Hezbollah, samtök studd af Íran, skiptust á skotum eftir að stríðið í Mið-Austurlöndum breiddist út til landsins á mánudag.

„Í miklum skotbardaga í kvöld særðust þrír friðargæsluliðar inni í herstöð sinni í ... Qawzah“ í suðurhluta Líbanon, sagði í yfirlýsingu frá Bráðabirgðasveit Sameinuðu þjóðanna í Líbanon (UNIFIL).

„Sá sem er alvarlegast slasaður hefur verið fluttur á sjúkrahús í Beirút til meðferðar.“

Her Gana sagði að höfuðstöðvar herfylkis þeirra í UNIFIL hefðu orðið fyrir „tveimur flugskeytaárásum“ og bætti við að „tveir hermenn séu lífshættulega slasaðir, en einn annar hefur orðið fyrir áfalli“.

„Mötuneyti yfirmanna varð einnig fyrir árás og brann til kaldra kola.“

Sprenging í BeirútEldhnöttur rís eftir flugskeytaárás Ísraels á suðurhluta höfuðborgar Líbanons í gærkvöldi.

Mynd: AFP

Hvorki UNIFIL né her Gana tilgreindu hver stóð á bak við árásina, en alþjóðlega sveitin sagðist ætla að rannsaka aðstæður atviksins.

„Það er óásættanlegt að ráðist sé á friðargæsluliða sem sinna verkefnum samkvæmt umboði öryggisráðs (SÞ),“ bætti hún við.

Í yfirlýsingu fordæmdi Joseph Aoun, forseti Líbanon, „árásir Ísraels á Líbanon“ og bætti við að þær hefðu „jafnvel náð því stigi að vera bein árás á UNIFIL“.

Fórnarlamb loftárásaSjúkraflutningamenn flytja lík af lendingarstað loftárásar Ísraels í Tyre í Líbanon í gær.

Mynd: AFP

Emmanuel Macron, forseti Frakklands, fordæmdi „óásættanlega árás“ á UNIFIL eftir að hafa rætt við starfsbræður sína í Líbanon og Sýrlandi.

„Frakkland vinnur með samstarfsaðilum sínum að því að koma í veg fyrir að átökin breiðist frekar út á svæðinu,“ sagði Macron á X og lagði áherslu á „lykilhlutverk“ sveitar SÞ í að viðhalda stöðugleika.

Í færslu á X sagði Jeanine Hennis-Plasschaert, sérstakur erindreki SÞ fyrir Líbanon, að hún væri „hrygg yfir því að samstarfsfólk okkar hafi slasast og óskar þeim fulls bata“.

UNIFIL hefur starfað sem stuðpúði milli Ísraels og Líbanon í áratugi og aðstoðaði líbanska herinn við að brjóta niður innviði Hezbollah nálægt landamærum Ísraels eftir síðasta stríð milli samtakanna, sem studd eru af Íran, og Ísraels árið 2024.

Áætlað er að allar hersveitir verði dregnar frá Líbanon um mitt ár 2027.